Oomeme ya geela omadhipago goomeme naanona

By: OSWALD SHIVUTE

AMUSHANGANDJAYI gwopevi gwoSwapo mee Laura Mcleod-Katjirua okwa popya nomuthindo ti indile oomeme moNamibia, unene mboka yoSwapo ya kale kumwe noya kondjithe tagu pu mo lela iilonga yiimbuluma tayi ningilwa oomeme naanona kaalumentu yaNamibia, ngashi unene omadhipago gaanahenda ngoka taga uhala taga ningilwa oomeme nuunona.

Ndhika meme McLeod-Katjirua, okwe dhi popila moshigongi shongundumutima yewawa lyoomeme mongundu yoSwapo shoka sha ningilwe mOshakati moshitopolwa shaShana mOlyomakaya ngaka ga zi ko.
Mee Mcleod-Katjirua ta ti, ethimbo olya thika nee thiluthilu oomeme yoSwapo ya thikame noya kuthe ko oongaku mekondjitho lyiimbuluma ngashi mbyoka yi na sha nuukashikekookantu, ano omadhipago goomeme nuunona, ehepeko lyoomeme naanona, okwe ekelahi uunona momandoloma nomuundjugo, okulongitha aanona, omaso guuhanona, esondjala lyuunona nokuninga omanyutu, omakwatonkonga niimbuluma yilwe yi nyanyaleka, okwe ekelahi oothigwa naanona ya mona iihuna, eningonayi lyaakulupe, eningonayi lyaamba ya kwatwa notaya lumbu nombuto yoHIV/AIDS, elongithonayi lyiikolitha niingangamithi nosho wo eyakomo lyaantu moshilongo, oshinima shomalukanda, oshinima sholuhepo lwomagumbo mokati koshigwana, okwaaniilonga mokati koshigwana, oshiponga shoshikukuta mokati koshigwana nosho wo eyopombanda lyiiponga yiihauto moondjila moka.
Shi na sha nomadhipago goomeme nuunona, mee McLeod-Katjirua ota ti kutya yo ongoomeme yaNamibia oya lulilwa nayi noonkondo koshinima shika. Ta ti itashi mono ehulilo nande. “ Twa li ku popya. Twa li ku lila. Twa li kukema.
Twa li kuninga omahololomadhilaadhilo nosho tuu, omadhipago itaga shuna monima. Ngashingeyi otwa mana po.
Katu shi we kutya otatu ningi shike, notu wete kutya shapo a tu ka pula oomeme ayehe moshilongo tu ka ninge ehololomadhiladhilo lyokukelela kaya ye we moondjugo uule woomwedhi ndatu, pamwe hwepo. Oshinima shomadhipago goomeme , tashu uhala ashike tashi yi komeho kashi li we nawa shika nande notu na nee okuninga po sha, ano okupopya elaka ndyoka pamwe tali uvika ko kaalumentu aaNamibia, oshoka oye tu lulila nayi moshinima shika,” Mee McLeod-Katjirua ta ti ngawo neyeme enene. Ta ti kutya yo ongoomeme oye na omaipulo omanene kutya oshinima shokudhipaga oomeme oshi ikwatelela ngaa shili kiihole nenge opu na shimwe shi ili. “Ondi wete omeho agehe okutseni ga tala tu lundululeni onkalo notu taaleleni neitulomo enene omashongo ngoka ga taalela onkalonawa yetweni. Otandi indile ootate ya kale ya simaneka oomeme nangele otaye shi ningi, taye ki ipa ngaa oombedhi sho esiku limwe taya ka adha oomeme uya geya, ya kenyanana notaya lala ashike omagombe.
Taya holola omadhiladhilo kutya ya vulwa inaya hala we, shapo aalumentu nayi itedhulule nokwe etha po okudhipaga oomeme,” mee McLeod-Katjirua ta ti ngawo. Ta gandja wo uusama koomeme yamwe moSwapo mboka kaya kutha ko iinima neitulomo.
Te yi indile kutya okuza mpaka naya kale taya kutha ko iinima neitulomo opo oomeme ya hupithwe momashongo ge ya taalela. Ta ti oomeme yamwe moSwapo, pehala lyokutaalela iinima yoshili nokutula po uukumwe, oyiipyakidhila nokutopola oomeme yoSwapo pokati nokupopyapopya puukololo nosho tuu.
“Oshinima shoka nashi mone ehulilo nokutaalela mbyoka tayi tungu oomeme noshigwana shaNamibia,” Mee McLeod-Katjirua ta ti ngawo nokwi indila oomeme yoSwapo ya kale kumwe nokuhangana muukumweumwe wekondjelo lyuuwanawa woomeme moNamibia. .

---