Omukokolipresidende a dhanena evalo lye mOnawa yaKiliana mOkatana mOshana

By: OSWALD SHIVUTE

OMUKOKOLIPRESIDENDE gwaNamibia omundohotola Sam Shafiishuna Nujoma mOsoondaha ndjika ya zi ko okwa dhana oshituthivalo lye sho a gwanitha omimvo omilongo hetatunane (84), e shi dhanene momukunda Onawa yaKiliana popepi nOkatana moshitopolwa shaShana.

Oshituthivalo she, shoka sha kalwa wo komupresidende Hifikepunye Pohamba, Omuprima Hage Geingob nosho wo koominista naandhoka dhopevi, kaanambelewa aakuluntu mepangelo nomomahangano ngoka gaa shi gopapangelo, kaawiliki yopamuthigululwakalo noyopambepo, aanangeshefa, aanafaalama nosho wo kengathithi enene lyaakwashigwana mwa kwatelwa aanyasha yoSwapo nosho tuu mboka oyo ya longekidha oshituthivalo shika shomukokolipresidende, sha dhanenwa mumwe noshawo sho 12 May Movement, shoka sha totelwe po omvula ya zi ko mOshiwakopo mErongo nelalakano lyokudhimbulukwa onkandangala ya dhanwa komukokolipresidende Sam Nujoma pethimbo lyekondjelomanguluko lyaNamibia, nosho wo kaanona oyendji lela, osha dhanenwa momukunda Onawa yaKiliana popepi nOkatana moshitopolwa shaShana. Omupresidende Pohamba osho wo omukokolipresidende Nujoma oya pandula noonkondo kaanyasha yoSwapo sho ya longekidha Oshituthivalo shika nawanawa. Taya dhimbulukitha aagundjuka kutya oyo aaleli yokomeho na nayi ihumbate nawa.
Taya ti oshinima shokudhipaga oomeme naanona nashi mone ehulilo meendelelo ngashi tashi vulika. Yo taya landula miiholelwa iiwanawa ya ningwa po kaawiliki yawo. Omukokolipresidende sho a thiki pehala mpoka ongula yOsoondaha ndjoka, okwa falwa mondjugo yOshiwambo ya li ya tungwa pehala mpoka. Sha ningwa ongendhindhiliko lyokanona opo ka valwa.
Ta zi mo nee a fa e li komugongo gwa meme gwe, ano a fa e li komugongo gwameme Lydia Iipumbu, Omukulukadhi gwelenga enene tatekulu Herman Ndilimani Iipumbu nokwe endithwa nee ta talithwa oshigwana shoka sha li she ya koshituthivalo she, sigo ta thikithwa nee kehala hoka kwa ningilwa iipopiwa. Oshituthi oshe egululwa nee negalikano komumbiisofi omukulu gwELCIN omundohotola Kleopas Dumeni.
Taku landula nee aapopi yalwe ngashi kuhamushanga gwaanayasha Elijah Ngurare, oonakutanga omukokoli, yootate Vilho Shilongo nooyakwawo mboka ye shi ningi pamukalo gwuutewo. Elenga enene lyUukwambi tatekulu Iipumbu naye okwa popitha wo oshituthivalo shomukokoli shika, opo ihe okwa landula omupresidende Pohamba, ngoka i ithanwa koshipopilo komuprima Hage Geingob.
Oshituthi osha li she ende nawa lela. Okwa lopotwa ashike oshiponga shimwe shohauto shoka shi idhenge mumwe noshikwawo, sha adhika tashi yi koshituthivalo shika. Otaku tiwa kutya omwe ehamekwa aanona yamwe kashona noya li ya pangwa moshipangelo mOshakati. Iipopiwa ya ningilwe mpoka, oya li iiwanawa lela, tayi tungu notayi gandja oshiholelwa oshiwanawa koshigwana, unene tuu shoka shokomongula.

---