Mwene gwehangano lyokutunga a pewa omimvo 9 mondholongo

MWENE gwehangano lyokutunga ngono kwa kundanekwa a zimina kutya okwa kengelela uuministeli wuuhaku nonkalonawa oshimaliwa shi thike lwopomiliona yimwe oshinkwanu ne mpoka okwa tuminwa mondjedhililo uule womimvo dhi li omuoyi mEtitatu lyoshiwike tuu shika. Etumwalaka lya nkondopala lela kutya uufuthi ka wu na uuwanawa washa nali thike wo anuwa moshigwana tashi pitile megeelo tuu ndika lya pewa omukalimo gwomOvenduka gwedhina Johannes Polla Giola Jarson, mangestrata Claudia Claasen osho a tumbula ngaaka sho a li a gandja egeelo ndika mompangu mOvenduka. Jarson gwomimvo 44 ngono kwa hokololwa a hokana nokuli he yaanona yane okwa ti oku na ondjo miipotha ayihe itatu yokukotokela momasiku sho ga li 18 Maalitsa.

Jarson nayakwawo yatatu oya li ya tamanekelwa iipotha itatu yiilonga ya vundakana yokulongitha iipundi yawo yopambelewa okukengelela nokugandja wo oodokumende haadho. Sho Jarson oye owala a holola kutya oku na ondjo oshipotha she oshi itulilwa kwaashika shayakwawo.
Momushangwa gwe etelwa ompangu Jarson okwa tya pokati komwedhi Kotoba 2007 nomwedhi Juni 2008 ye naanambelewa yakwawo yuuministeli wuuhaku nonkalonawa oya kengelele uuministeli mboka sho yi  ifethitha kutya ehanganoo lye lyedhina Giola Building Construction olya pewa ootendela nolya futwa konima sho lya longo iilonga mbyoka. Iifuta ya adha pomiliona N$1,41oya futwa nee ehangano ndyoka. Jarson okwa ti Nicolaas van Wyk ngono a li omuyaluli muuministeli wuuhaku, Derick Jansen ngono a li wo omuniilonga muuministeli owo tuu mbono osho wo Simon Iipinge naye wo a li omuniilonga muuministeli oya kwathele mekengelelo ndika.
Jarso okwa ti Van Wyk oye naanaa e ya po nedhiladhilo ndyoka lyokukengelela uuministeli sho a lombwele Jarson a gandje uuyelele wehangano lye lyokutunga nokuninga omaindilo gootendela.
Jarson okwa ti ethimbo kehe iimaliwa ya tulwa ko okwa kala ha kutha ko iimaliwa noku yi pa Van Wyk pauvathano ndino kutya na kale hi ithigile po ooN$45,000 kofuto kehe ta yi futwa Giola Building Construction. Okwa lombwele ishewe mangestrata kutya ye okwa kutha ombinga moskema ndjoka yokukengelela shaashi okwa li momukundu gwoshimaliwa unene pethimbo ndyoka.
Jarson okwa holola puuyelele kutya yo oya kengelele uuministeli mokwi ifethitha kutya otaya ka longa ko iilonga yontumba noyongandi koshipangelo shepangelo shEenhana nokutunga okaklinika, okila yomidhimba osho wo olukalwa lwaaniilonga kOtjituuo niilonga oya li ya ti oye yi mana. Uuministeli anuwa owa futu Giola Building Construction iikando itatu momiyalu ngaashi dha holoka N$460,553, N$480,653, N$471,984 pakengelelo nee ngaaka. Ekengelelo okwa talika ko oshipotha lela oshinene nopashipotha nee shika shaJarson epangelo inali galulilwa nando oyo osenda yimwe.
Onkene mangestrata a gandja egeelo kuJarson lyomimvo hamano mondholongo hono kwa kuthwa ndatu dha kankamekelwa keuvathano ndino ngele Jarson okwa kala inaa tamanekelwa ekengelelo nenge ngaa nee uufuthi wowenewene pethimbo ndyoka a kuthwa manga miilonga pakathimbo miipotha ayihe mbyoka yi li itatu. Jarson, Van Wyk, Jansen osho wo Iipinge oya kwatelwe po kokakomisi kokukondjitha iilonga ya vundakana kuyele muJanuali 2011. 0Egeelo nee ndyoka lya pewa Jarson anuwa oli na okumanwa sha landulathana naashino osho nee she etitha Jarson a pewe okukala mondholongo uule womimvo kumwe dhi li omugoyi. Jan Wessels oye a li a kalela po paveta Jarson moshipotha she shika shekengelelo omanga Phineas Nsundano a li ta tamaneke moshipotha osho tuu shika.

---