Iitaakadha, ependafule lya ka lala

By: OSWALD SHIVUTE PONGOLO

EPENDAFULE lya tseyika nawa miiyimbo, miidhano nomoontanto dhopamuthigululwakalo, unene tuu ndhoka dhomUukwambi, tatekulu Eliakim Iita Uutoni, a tseyika nee nawa nedhina Iitaakadha gwomomukunda Ongolo mUukwambi moshitopolwa shaMusati, okwa manene oondjenda dhe moshipangelo shaShikuku meti 4 Mai 2013 konima yuuwehame nomepipi lyomimvo omilongo omugoyi nayimwe (91) lwaampoka.

Nakusa tatekulu Iitaakadha, oye a kala mwene gwongundu yuudhano wopamuthigululwakalo ya tseyika nawa yedhina Iitaakadha Cultural Group nokwa kala aluhe oye he yi kwatele komeho miiyimbo nomomaudhano ngoka gopamuthigululwakalo, unene dhOshikwambi.
Engathithi enene lyaalilasa olya li lya holoka poshituthidhimbuluko she mEtitano lyeti 10 Mai 2013, mwa kwatelwa nomukokolipresidende Sam Shafiishuna Nujoma, ngoka e li kuume kopothingo kanakusa tatekulu Iitaakadha na oye wo e li kahewa kongundu yuudhano wopamuthigululwandjika ya Iitaakadha Cultural Group nosho wo nee mesiku lyefumviko lye mOlyomakaya geti 11 Mai 2013 poElim okuziilila pegumbo lye pOngolo mpoka pwa ningilwa opolohalama yoshituthifumviko she.
Omudhimba gwe ogwe etelwe po poshigumbo she omutenya gwEtitano moka mwa ningwa oshituthidhimbuluko she, gwa kundukidhwa kiilyo yetanga lye lyokwiimba nokutanta oontanto dhOshikwambi, yi li momizalo dhopamuthigululwakalo, tayi imbi naanaa ngashi ya kala hayi imbi mekwatelokomeho lyomukuluntu gwawo nguka nakusa Iitaakadha. Kombanda yoshiketha shomudhimba gwe okwa tentekwa oongoo dhe dhopamuthigululwakalo ndhoka a kala ha zala pethimbo taya dhana oontanto dhawo ndhoka nokwi imba oondjimbo dhopamuthigulukwalo gwOshikwambi, kumwe nembale lye nengadha lyalyo.
Ongula sho kwa shi, ano mOlyomakaya, iilyo yongundu yIitaakadha ndjika natango oya kala ya kundukidha oshiketha she nokwiimba naanaa ngawo natango. Konima okwa landula nee opolohalama yoshituthifumviko she pakwatelokomeho lyomuwiliki gwoshituthifumviko tate Engelebrt Atshipara, ngoka a li a yambidhidhwa kaawiliki yakwawo yooPetrus Maria Maria Amutenya natate Melekisedek Nkandi. Omusita Wilibard Shikesho oye a li a ningi omagalikano gopetameko lyiituthi mbika iyali. Ondjokonona oye etelwe po kukaansela gwoshikandjohogololo shaShikuku tate Modestus Amutse. Omwiindili gwEesalu, tate Vilho Shilongo ta eta po ontakumandjimbo yanakusa. Tate Lisias Iiyambo oye e eta po ewi lyaavali. Laina Naambo Iita ta popi pehala lyaavalwa. Selma Ambondo Iita ta popi pehala lyaamwayina. Ewi lyaatekulu olye etwa po olye etwa po kuErasmus Shikongo, newi lyamwene gwomukunda okumeme Aino Mbangula Erasmus.
Ewi lyookuume okutatekulu Eliaser Endjala. Ewi lyoombushe okutatekulu Eliakim Shivolo. Etumwalaka lyongundu yoSwapo okucomrade Alina Kafula. Ewi lyongundu yIitaakadha olye etwa po koshilyo shongundu ndjika tate Kassian Kanyemba. Etumwalaka lyaanangeshefa yoSwapo tali etwa po kutate Sigo Amunyela. Ewi lyombelewa yomuthigululwakalo yaMusati olye etwa po kumeme Novata Iipinge. Ewi lyoshikandjohogololo Elim tali etwa po ku kaansela gwoshikandjohogololo shElim tate Gerhard Shiimi. Ewi lyeelo lyopamuthigululwakalo lyUukwambi tali etwa po kelenga enene lyUukwambi tatekulu Herman Ndilimani Iipumbu. Etumwalaka lyakuume kongundu Iitaakadha tali etwa po komusimanekwa omukokolipresidende omundohotola Sam Shafiishuna Nujoma, omanga etumwalaka lyepangelo lyomupresidende Hifikepunye Pohamba lya leshwa pehala lye kukaansela gwoshikandjohogololo shaShikuku tate Modestus Amutse. Euvithopopitho mesiku lyoshituthidhimbuluko olya ningwa komusita omundohotola Matheus Shapaka Kapolo, omanga euvithopopitho mesiku lyoshituthifumviko lya ningwa komumbiisofi omukulu gwa ELCIN omundohotola Kleopas Dumeni.
Moshipopiwa she shomahekeleko, omupresidende Hifikepunye Pohamba okwa tanga nakusa Iitaakadha, a li omutse gwegumbo lye omwaanawa, he , hekulu nosho wo omuleli gwoshigwana she omwaanawa nomusimanekwa kwaayehe. Omupresidende Pohamba ta ti nakusa Iitaakadha okwa ka;a a tseyika nawa megandjo lyuunongo nuunkulungu we miinima yopamuthigululwakalo, ngashi unene miiyimbo, miidhano yoontanto nosho tuu.
Omupresidende Pohamba ta ti ewi lye kalya li ashike tali uvika moNamibia ayike nokugandja omukumo kwaamboka ya kala meni lyoshilongo, ihe nopuushiinda wo, unene kaaNamibia mboka ya kala muupongekwa kwali pethimbo lyekondjelomanguluko lyaNamibia. Omupresidende Pohamba ta ti nakusa Iitaakadha, okwa ya lela a thigila oshigwana shaNamibia uuyamba uunene wiinima ya pamba omithigululwakalo dhoshilongo, nosha yela kutya oshigwana itashi ke mu dhimbwa, naashoka shokomongula tashi ka tsikila ko kuunongo mboka e shi pa. “ Iitaakadha na vululukwe nombili,” omupresidende Pohamba a ti ngawo metumwalaka lye lyoluhodhi.Omukokolipresidende naye okwa tanga nakusa Iitaakadha a li omunamibia gwolela eshi okuya nokuza po. Ta ti okwa thigila aaNamibia, unene oshigwana shokomongula, oshiholelwa oshiwanawa.

---