Elelo lyaNdonga otali ti inali gandja omalombwelo kuNelulu naNghaamwa

AMUSHANGA gwelelo lyopamuthigululwakalo gwaNdonga Joseph Asino ita tsu kumwe naashino kutya oya gandja omalombwelo kwaangono e li omunashipundi gwelelo lyopamuthigululwakalo gUukwanyama George Nelulu osho wo kugavena gwoshitopolwa shaHangwena Usko Nghaamwa ya thige po omahala gawo ge li melelo lyaNdonga.

Ashike oshifonkundana shoThe Namibian oshi li shi na omishangwa dhomalombwelo ngoka gaali, gumwe ogwaNelulu nomukwawo gwaNghaamwa tadhi ya lombwele ya thige po evi ndyoka.
Omalombwelo ngoka otaku popiwa ngaa ga gandjelwe kokakomisi ka li ka totwa po komukwaniilwa gwaNdonga tatekulu Immanuel Kauluma Elifas pokati ngaa komumvo gwa zi ko nelalakano okutotha mo aantu mboka ye na omahala nenge tu tye omavi omanene kUuzilo waashono sha li sha tseyika nale oshilongo shaNdonga, unene tuu aanafaalama mboka yaa shi aapopi yelaka lyOshindonga opo ya pewe omalombwelo ya thige po omavi ngoka ya thigile mboka yaa na omahala okulongela mo uunamapya osho wo uuniimuna.
Asino okwa yelitha kutya omukwaniilwa gwaNdonga ke na okakomisi hoka ka kundanekwa nongele opu na kamwe oka hogololwa anuwa shila omukwaniilwa kee shi shi. “Onda hala ndi mu lombwele kutya omukwaniilwa nelelo lye lyopamuthigululwakalo ka ye shi sha kombinga yokakomisi hoka na inaya gandja elombwelo komuntu a ye a ka tidhe mo aanafaalama mbaka yokoshitopolwa shUukwanyama. Otamu vulu oku shi tula miifonkundana yeni kutya inaya tila sha oshoka omukwaniilwa gwaNdonga nelelo lye lyopamuthigululwakalo inaya gandja nando omalombwelo ngoka”, Joseph Asino a lombwele oshifonkundana shoThe Namibian ngaaka.
Osha li sha lopotwa oshiwike sha zi ko kutya elelo lyopamuthigululwakalo gwaNdonga olya tokola lya mana okutidha mo Nelulu naNghaamwa momahala ngoka ye li ge li melelo lyaNdonga moshitopolwa shaShikoto mono mboka yaali ya kala taa longele uunamapya nuuniimuna okuza lwopomimvo dhe1980 opo ya gandje wo omahala kwaambono ye li monkalo ondhigu yoshikukuta.
Shino oshe e ta anuwa oyendji ya dhiladhile kutya einyengo lya fa mpoka olya nika lela uukwamuhoko nopolitika. Amushanga gwokakomisi hoka taka popiwa Ananias Iiyambo okwa popile oshiwike sha zi ko kutya oyendji yaapopi yelaka lyOshindonga oya kala ethimbo nethimbo taye ya komukwaniilwa tatekulu Immanuel Kauluma Elifas nelelo lye lyaNdonga taya nyenyeta kutya ka ye na evi lyuulithilo oshoka omahala ogendji oga kuthwa po kwaamboka yaa shi nando okashona aapopi yelaka lyOshindonga.
Nonando nee okakomisi hoka taka popiwa ka totha mo nee oyendji yomwaamboka yaa shi aapopi yelaka lyOshindonga unene tuu mboka ya za kelelo lyopamuthigululwakalo gUukwanyama Nelulu naNghaamwa anuwa oyo ashike ya pewa omalombwelo ngoka molwashoka omapopyo otaga ti oye na oofaalama oonene noonkondo dhi vule poohectare 1000 kehe gumwe, osho Iiyambo a tile ngaaka oshiwike sha zi ko. Aanafaalama mbaka Nelulu naNghaamwa anuwa oya li ya pewa omalombwelo ya thige po omahala gawo momasiku sho ga li 11 Apilili omumvo tuu nguka tu li.
Iiyambo okwa li wo a yelitha kutya ngano omatseyitho ashike gaa na manga esiku lyahugunina nokwa tile omatseyitho gahugunina lela taga ka popya sha yela go ge na esiku lyahugunina mbono ye na okukala ya thiga po omahala ngono otaga ka gandjwa mbala. Nelulu okwa li wo a tumbula u uvithwa nayi ketokolo lyoku mu tidha mofaalama ye ndjoka a kala lela nayo manga noshilongo shika inaashi manguluka naNghaamwa ina vula okumonika a komende kwaashika.

---