Disability Council komapopyo gaKamwi

OSHIKUMUNGU shoDisability Council sigo onena osha fa ngaa nee owala tashi pewathana ashike ombedhi konima sho omuwiliki gwoDisability Council gwedhina Martin Limbo a ti minista yoshikondo shuuhaku nonkalonawa Richard Kamwi okwa fa e etha ashike oshiputudhilo shawo shika nokwa fa anuwa kaa dhi na uushili ndhono a popile kutya oDisability Council oya fa hayi longitha nayi oshimaliwa shoka yo ya ti ka sha li momake gawo ngaashi Kamwi a li e shi popi.

Kamwi okwa popile kutya oNational Disability Council oya longitha nayi oshimaliwa shono ya li ya pewa shomumvo 2012/2013. “Onda ndhindhilike nekemo kutya omakwatho gamwe po ga pewa ewilikongundu ndika oga gandjwa pwaa na uushili woodokumende dhopashimaliwa nopoompito dhilwe aagandji yomakwatho oya pewa ko omatata kiimaliwa yiilonga inaayi pwa natango okulongwa”, minista Kamwi a tumbulile ngaaka.
Limbo ota nyenyetele nee uuministeli naangono a kwatela komeho uuministeli mboka kutya oDisability Council oya kala ashike ye ethiwa ngaaka okuza naanaa momumvo 2011.
Limbo ota ti aanambelewa yuuministeli wuuhaku nonkalonawa oye ya lombwela kutya itaya vulu okugandja iimaliwa koDisability Council shaashi ka pu na ewilikongundu.
Shino oshe e ta nee anuwa pahapu dhaLimbo uuministeli mboka wu kale noshimaliwa shoka sha nuninwa oDisability Council nokukala hawu futu oondjambi dhaaniilonga nosho tuu. “Iimaliwa yini ano ta popi? Inatu mona nando oshimaliwa sha sha okuza muMai omumvo gwa zi ko sigo omuApilili omumvo nguka”, Limbo a pula ngaaka mokuyelitha nawa shika. Konima yomimvo mbali sho pwa kala pwaa na ewilikongundu, opo ashike lyu ulikwa omwedhi gwa zi ko.
Omuwiliki gwoDisability Council oku uvite kutya sha kala sha kateka euliko ndika lyewilikongundu oshe e ta lela engwangwano kiilonga yoDisability Council.
Minista na lombwele oshigwana oshili nokwa li nokuli e na okukala u ulika ewilikongundu ndika muule wethimbo lyomasiku ashike omilongo ndatu. Oshifonkundana shoThe Namibian osha kundanekwa nawa kutya Limbo okwa nyolela uuministeli wuuhaku nonkalonawa oombapila ndatu te yi indile ye endelele oku ulika ewilikongundu nokupula wo omayele ngele ota vulu okulongitha okakomitiye ke na sha nootendela kuuministeli owo tuu mboka okumona wo omayakulo.
Martin Limbo okwa tsikile ta ti uuministeli inawu ya galukila uule womimvo ndhoka adhihe mbali noye ya galukile ashike muJanuali omumvo nguka naLimbo okwa holola lela kutya oya li ashike ya thigwa momilema sigo uuministeli we ya kwathele nee ooN$510,000 okufuta oondjambi dhaaniilonga nayilwe.
Oshifonkundana shoThe Namibian osha kala nokutumwa okuza kombelewa yimwe oku ya konkwawo mokukonga omayamukulo melongitho nayi lyiimaliwa koDisability Council ndjoka.
Minista Kamwi okwa li a ti uukwamuhoko noshimaliwa shoka kaa shi po osho she enditha kashona euliko lyewilikongundu ndika. Ndhino okwa li e dhi popi sho a li a pulwa koshilyo shoparliamende shoSwapo Alexia Ncube kwaashoka.

---