Oshimaliwa nashi longithwe nawa

EGUMBO etiyali lyopashigwana lyoNational Council okwa kundanekwa lya longitha nayi noonkondo oshimaliwa tashi ihile poN$400 000 moshimaliwa shuuwanawa wolweendo ashike lwomasiku omulongo nagahamano lwa yile koUnited States of America.

Okwa lopotwa olweendo nduno lwa yile ashike lwaa na nando shi lwa ka ningile sha nika iilonga, oonzo dha li iilyo yosheendo ya lombweleThe Namibian ngaaka.
Shino oshipe sha lopotelwa egumbo ndika etiyali lyoparliamende shaashi okwa kundanekwa National Council nokondandalunde okwa tumbulwa omupehanashipundi gwegumbo ndyoka etiyali lyoparliamende Margaret Mensah-Williams e shi ninga omukalondjigilile gwokuhepitha oonzo dhepangelo momalweendo ga na sha niilonga opo aanambelewa ya pule uuwanawa woshimaliwa sholweendo (Subsistence and Travel allowances (S&T), Mensah Williams kwaashino okwa ti ka shi shi shoshili.
Okwa hokololwa pathimbo ndino kutya aanambelewa yaheyali yoNational Council oya yile ko UN Commission pankatu yoomeme koNew York  koshimaliwa shoN$372 829 nomapopyo ga kala po ogo ngono kutya ka ya li ya hiywa ko shili koshiithanene hoka ashike oya kala nokukondjitha kutya otaya yi.
 Natango egumbo etiyali lyoparliamende okwa kundanekwa lyu unganekele esiku limwe li na sha nomamonithathano giihuna momagumbo muga6 Maalitsa inaa li yela nawa noshituthi shoka osha ningilwe owala muule woowili mbali sho osha pwa nale negumbo ndika etiyali lyopashigwana  okwa kundanwa lya futa ehala niilongithwa yilwe ya nuninwa esiku ndyoka.
Kolweendo Mensah-Williams ngono a li omukwatelikomeho gwosheendo okwa ti oya hiywa koInter Parliamentary Union (IPU) ndjono ya hiya wo ooparliamende yoomeme yokuushamba.
Ominista yiinima yopondje Netumbo Nandi Ndaitwah okwa ti ye ke wete sha puka shaashi oye a shayina oombapila dhokuya pitika oku ya hoka sho ka shi shi shotango aanambelewa yopamuthika gwoparliamende taa yi koshiithanene shoUN Commission.
Omilandu dhepangelo kombinga yoSubsistence and Travelling allowance (S&T) okwa hololwa kutya olweendo oku ya koNew York mwa kwatelwa nomahala mpa taa ka kala, iikulya noIncidental expenses otayi pula epangelo US$777 mesiku nokomuntu gwondondo yaMensah-Williams  otashi pula US$579 mesiku koshilyo kehe shoparliamende.
Okwa gwedhwa wo kutya omunambelewa e na sha niikwaveta ota mono US$416 mesiku moNew York namushanga gwokakomitiye kolweendo ota mono US$347 mesiku koNew York hoka.
Kumwe ngele wa gwedha ko ooSubsistence and Travelling Allowances (S&T) dhaayehe otashe eta omwaalu gwoshimaliwa gu ye poUS$40 470 nomondjele yoshimaliwa shetu kumwe otashe eta N$372 829 ina mu kwatelwa oofuto dhoondhila sho ya yi nokugaluka ko.
Ontengenekothaneko yoSubsistence and Travelling Allowances (S&T) yegumbo etiyali lyoparliamende omumvo gwa yi oya li ya tengenekelwa poomiliona N$11.9 nonumvo oya tegelelwa yi gwedhelwe sigo okoomiliona N$12.4. Momumvo 2009 osha li poomiliona N$9, oomiliona N$10.4 momumvo 2010 noomiliona N$11.4 moma2011.

---