Swapo ota futile oshigongi shomilandu

OSHIGONGI shomilandu shoka tashi hulu etine oshiwike shika moVenduka, otashi futilwa kongundu tayi pangele ndele nee ita shi futilwa kepangelo. Etseyitho ndika olya ningwa kOmuprima Minista, Nahas Angula pethimbo ali a popitha oshigongi shoka a dhimbulutha aaniilonga yepangelo mpoka kutya kayeli mefudho sho ye ya oku kala musho.

Oshigongi shika osha kalwa kaakalelipo yeli omathele 350 ya za momawawa agehe goSwapo okuza kiitopolwa ayihe yoshilongo.Angula okwa ningi etseyitho ndika konima sho kwa popilwe omumvo gwayi kutya epangelo olya kala ha li futile iigongi ya longekidhwa koSwapo. Nonando olundji Swapo okwa tile iigongi mbyoka okwe yi futila yemwene ndele mbyoka ina yi futilwa kepangelo, kali a vulu oku gandja uumbangi mboka tawu ulike kutya oye a futa shili omayakulo ngoka gamwe ga gandjwa kepangelo. Uumbangi mboka wulipo oomboka tawu ulike kutya epangelo olya kala noku futila iigongi yontumba yoSwapo. Kape shiwike ishewe kutya epangelo ota li ka futilwa ngiini molwekanitho ndyoka lya mono molwaashoka aaniilonga yamwe oya kala yaali piilonga yawo sho ye li poshigongi shomilandu shoSwapo. Kape shiwike woo ngele aaniilonga mboka  ya li poshigongi shoka oya li ya kutha efudho.
Mu Juni omumvo gwayi okommittee yomayalulo yoparliamende oy ali ya pula efatululo kwaamushanga takalele mombelewa yomuprima Minista, Nahas Angula, kombinga yofuto yomambo ngoka ga li ga nyanyangidhwa omolwa okongressa yoSwapo yomumvo 2007. Embo ndyoka lyomapandja 178 olya kotha oodola omayovi 123 850, na okwa li lyiithanwa ongo omushangwa gwoshigwana, na olya futilwa kaafendeli aaNamibia. Oshiningwanima oshikwawo moka epangelo lya li lya futu nonando, oSwapo oyo ya li yina okufuta, ooshoka shoshigongi sha Africa-China Youngleaders sha ningilwe mu May omumvo gu. Omahangano ngoka ga gandjele omayakulo oga li inaaga futwa omolwago, sigo oosho oshikondo shaagundjuka mepangelo sha li shi indilwa opo shi futile omayakulo ngoka.
Omanga oshikondo shoka sha li inaashi futa, amushanga muuministeli mboka Peingodjabi Shipo okwa li a ti iifuta yoshigongi shoka oyina okufutwa koSwapo yoyene, noshowo kongundu yuukomuni yokoChina.Shipo okwa li a koleke kutya oshikondo she osha li ashike sha futile  ongundu yuudhano  yaaChina pauvathano pokati kiilongo mbyoka iyali.Oshinima shika osha holoka  no tashi talelwa moonkambadhala dhaawiliki mongundu ndjoka oku ya pehala lyuupevi peresidende wongundu tayi pangele opo ya vule oku landula omuperesidende Pohamba.Aanawino ota ya ti oshinima shika osha eta opo pwaakale ondjoolola pokati kongundu yooSwapo nepangelo.

---