Omukiintu a kwatwa koonkondo mondholongo

OMUKIINTU gwomimvo 28 ngoka a tegelela oku hokololithwa kombinga yomalundilo gokufika, uufuthi, oku ehameka noshowo elongitho lyoonkondo okwa ti aniwa okwa kwatwa koonkondo mondholongo yopolisi posasiona ya Kaiti.

Omukiintu ngoka ota lundilwa a yaka iilongitho yomoshikunino, noshowo oku fika ondunda moka a li ha lala pegumbo lyomumwayina gwomukadhona, noshowo a longitha elaka ewinayi nomaihumbato ga nika uudhudhu eguukitha maashiinda.
Omukiintu ngoka aniwa okwa lalwa naye koonkondo kaalumentu yaali woo mboka ye li mondholongo poompito mbali dha yooloka.Komufala gwopevi gwopolisi, Rudolf Isaak okwa koleke oshiningwanima shoka a ti omukiintu ngoka okwa lopota oshiningwanima shika konima sho a kwatwa koonkondo oshikando oshitiyali oshiwike shayi.
Oshikando shotango moka nguka aniwa a kwatwa koonkondo osha li mesiku eti 31 August 2012. Isaak okwa ti opolisi oya ningi omakonakono gayo mbala na oya mono kutya omukiintu ngoka aniwa okwa li a yi miihulo naalumentu mboka sha uvathanwa ndele ina kwatwa koonkondo ngaashi a tseyithile opolisi. Isaak okwa ti omukiintu ngoka aniwa okwa zimine kutya okwa li a yi miihulo naalumentu mboka oku pitila miitenda yuutralisa wokandunda moka ali eedhililwa. Aanandholongo mboka taya fekelwa oyi ikala oshinima shika yati yo oya lala nomukiintu ngoka pauvathano.
Isaak okwa tsikile a ti omukiintu ngoka aniwa okwa  zimine kutya  okwa etapo ehokololo kutya okwa kwatwa koonkondo opo a thiminike opolisi yi mu kuthe mokandholongo moka a limo oye awike, ena uumbanda, oshoka oku na uuvu woshintona, na kali a hala oku kala moka oye awike.Isaak okwa ti otaku fekelwa kutya aalumentu aanandholongo mboka oye shipondola  oku ya mondunda yomukiintu nguka sho ya egulula omweelo guuka moshinyanga shili pondje.
Mbaka oya li yena uuthemba woku ya pondje oshoka oyo haya longekidhille aanandholongo iikulya.Isaak okwa koleke kutya aantu mboka oya patulula ekumba nomikalo ndhoka yo haya longitha. Opolisi oya patulula oshipotha shina sha nekwato koonkondo.

---