Ndishsishi mehilathano nooraata dhuunamiti molweshangitho

AMUSHANGA omukuluntu mOshikondo Shuundjolowele Nonkalonawa, ota lundilwa aniwa kutya okwa hala oku tula pevi omuthika gworaata yaanawino muundjolowele nenge Health Professions Council sho indile ndjoka opo yi shangithe oondohotola dhina uulongelwe tawu nikanikwa.

Andrew Ndishishi okwa tilitha oraata ndjoka aniwa kutya ite ke yi pa ekwathelo lyayo lyopashimaliwa okuza kepangelo ngele ina yi yuulululako kiipumbiwa mbyoka yina okugwanithwapo koondohotola ndhoka dha longwa pondje yoshilongo.Oonzo dhomoraata ndjoka odha ti iimaliwa mbyoka hayi zi kepangelo oya pumbiwa  okulongithwa momakonakono miilonga yuunamiti.
Oonzo odha ti onkalo ndjika yakuthwa kuuministeli oya hala okudhipaga omuthika ngoka hagu landulwa koraata yuunamiti nontseyo yomayego, opo shi vule okupa oondohotola  bdhoka dha ndopa okugwanithapo iipumbiwa yooraata ndjoka.
Onzo oya tsikile ya ti osha fa oshikondo shUundjolowele tashi gandja ombedhi koraata ndjoka sho inaayi shangitha oondohotola ndhoka nonando ndhika odha pitikwa oku longa miipangelo yepangelo , dha pewa epitikilo kuuministeli mboka nonando inadhi shangithwa noraata ndjoka. Uuministeli owa hala opo iipumbiwa yi shunwe pevi  opo oondohotola ndhoka dhi nyolithwe. Osha kala omukalondjigilile kutya oshikondo shUundjolowele ohashi utha nokuzimina oondohotola ndhoka dhi longe miipangelo yoholomende omanga ndhika inaa dhi shangithwa noraata. Pethimbo ndika opena oondohotola dha ziminwa okulonga miipangelo yepangelo dhili 113 ndele ndhika ina dhi nyolithwa noraata yuunamiti.
 Oshifo shika oshuuvite kutya odhindji dhomwaandhika odha longwa mo Democratic Republic ya Congo, Zimbabwe, noshowo mo Cuba. Oraata oyati uuministeli kawuna ompango ndjoka tawu longitha okuutha kutya olye ta pitikwa okulonga ongo ondohotola.Ndele Ndishsishi ngoka a tamekele iilonga yuuhamushanga wUundjolowele konyala oomwedhi dhontumba ngashingeyi okwa fa a pula oondohotola ndhoka dhiishangithe  noraata yuunamiti.Mombapila yomasiku 31 Juli nuumvo ndjoka Ndishishi a shangele  amushanga gworaata ndjoka, Ena Barlow okwa pula opo iipumbiwa yimwe yokwiishangitha kwoonganga noraata ndjoka yi shunwe pevi.Ndishishi okwa ti iipumbiwa yimwe oyi wetike aniwa yafa yaa uvitike noshowo yaali puuyelele.
Okwa shanga woo aniwa ati itashi idhidhimikilwa kutya oondohotola otadhi tsikile okulonga kohi yeziminino lyuuministeli , moku gwedhelwako ethimbo kookondalaka dhawo molwaashoka dha tindwa okushangithwa koraata ndjoka.Okwa ti onkalo ndjoka ka yi li muuwanawa womulandu guundjolowele wa Namibia.
Okwa ti iipumbiwa yeishangitho mbyoka oyili eshongo enene koshikondo shUundjolowele, unene tuu sho shika shiikwatelela koondohotola dhaza pondje yoshilongo.Onzo yimwe poraata ndjoka oya ti kashishi oshinima oshaanawa kutya oraata otayi thiminikwa okushangitha oondohotola ndhoka uuminsiteli wazimine dhi longe moshilongo , nopwaana okudhi kundathana noraata ndjoka.Onzo ndjika oya ti oku tula omuthindo kontseyo hasho shina oshilonga muundjolowele oshoka kehe gumwe ota vulu oku mona ontseyo ndele shika itashi ti kutya ngoka okwa longwa uunamiti.
Oya tsikile yati  shika osho eidhopomo lyaashi lyopaveta miinakugwanithwa yolutu lwopaveta mokuyi  lemaneka pashimaliwa.Ndishishi  okwa ekelehi omalundilo ngoka kutya okwa hala okuteta  omulekeneno gworaata ndjoka omolwa oshinima sheshangitho lyoondohotola dhina oonzapo dhopondje.

---