Mweshipooli ta indile ondhalate ye yi futwe

By: OSWALD SHIVUTE

OMUKALIMO gwomomukunda Ouwaananghala mOmbalantu moshitopolwa sha Musati, tate Mweshipooli Amutenya oku li e uvite nayi unene kondhalate ye ya tetwa po ku mushiinda gwomutekulu gwe momukunda Oipanda mOmbalantu tuu moka moshitopolwa sha Musati, na ina hala aniwa oku yi futa.

Unene, tate Mweshipooli, okuuvite nayi sho aniwa nElelo lyoshilongo sha Mbalantu, inali hala nakutokola po ondhalate ndjoka, e yi fute.
Pa hokololo lye tate Mweshipooli Amutenya, ota hokolola kutya, okwa li nomutekulu gwe Bolmeus Andowa ngoka a kala negumbo lye mOipanda mOmbalantu moka nokwa mana oondjenda dhe momumvo 1992. Sho a mana ngawo oondjenda dhe ofamili kumwe na tate Amutenya, oya tokola megumbo lya nakusa mu ye omumwayina gwa nakusa Bolmeus gwedhina Stefanus Shaumbwako, ngoka a kala koVenduka. Molwashoka Shaumbwako omushona kwali nokwa kala koVenduka, Ofamili oya tokola omumwayinakadhona oye a ka kelele mo manga. Pokati mpoka, nakukelela megumbo ndika, okwa kala e na uudhigu niimuna ya mushiinda she taku tiwa kutya oye tate Kanyakelwa Aindongo.
Omusamane Amutenya ta ti, omoluupyakadhi mbuka wiimuna yomushiinda hayi yi aluhe mepya lya Shaumbwako, okwa tokola a tule ondhalate pokati kepya lya Aindongo nolya Shaumbwako, ya kunkula naanaa naandjoka ya Aindongo kombinga ndjoka. Ano pokati kawo pu na okaupandainda okashona lela kuunene woometa mbali ashike.
Amutenya ota ti konima yethimbo okwa ka kundana kwaamboka yaandja Shaumbwako, taya ti kutya omushiinda shawo okwa teta po ondhalate ndjoka a tulile po noku yi mangela kumwe naandjoka ye, ano kapu na we okaupandainda. Amutenya okwa yi aniwa ku mushiinda ngoka, tate Aindongo noku mu pula kutya omolwashike a tetela po ondhalate ndjoka, nokwe mu ya mukula kutya oye e shi ninga molwashoka osho a hala yi kale ngawo. Pu na ashike olaina yimwe yondhalate.
 Inapu pumbwa pu kale okaupandainda koometa mbali ashike. Omushiinda ngoka te mu lombwele aniwa kutya, ite yi ningulula we, osho naanaa yi na okukala ngawo, nuushiinda shawo ou li ashike nawa ngawo. Omushiinda gwa Shaumbwako nguka te mu lombwele aniwa kutya, ye na Shaumbwako, uushiinda shawo ou li ashike nawa, oye (Amutenya) ashike ha zi kOuwaananghala wawo kokulekule hoka, te ya okupiyaganeka uushiinda wawo na Shaumbwako.
Amutenya ta ti oshinima okwe shi fala momakutsi gomutumwa gwa mwene gwomukunda, ngoka e shi fala momakutsi ga mwene gwomukunda. Mwene gwomukunda okwe shi mono kutya eteto lyondhalate ndjoka eyono, kashi li nawa. Mwene gwomukunda Oipanda nguka, te shi fala ku tate Akwenye Namwandi, ngoka e li omutumwa gwa Mwene gwoshikandjo shoka sha Hamuyala, elenga enene Petrus Aipanda.
Namwandi okwa pewa nee oshinakugwnaithwa shika a ungaunge noshipotha shika. Namwandi aniwa okwa kala e shi mwenena po manga, na Amutenya okwa yi ye mwene kelenga enene Aipanda, ndyoka lya ti na ka pitule Namwandi ya ye ko kehala hoka na osho a ningi.
 Taya ka pitula mwene gwomukunda Oipanda nokuya kehala hoka. Mokuya nee pondhalate mpoka, yamwe ngashi Namwandi, ota ti, aaye, ondhalate oyi li nawa sho ya mangelwa mumwe ngeyi, oshoka oya kola nee shi vulithe. Ye Aindongo aniwa ta ti kutya, ye okwe yi hanagula po ashike molwashoka ha ningilwa nayi ku Amutenya ta zi komukunda gwawo kokulekule hoka e ye e ya piyaganekele onkalo yuushiinda shawo, yi li nawa.
Amutenya, okuza mpoka, okwa yi natango kElenga enene Aipanda, ndyoka lye ya lyolyene li italele ko nolya mono kutya osha puka okukutha ko ondhalate koopaala dha mushiinda, hoka ya li ya mangelwa ku Amutenya. Elenga enene Aipanda tali lombwele Aindongo, e yi shune ko ngashi ya li. Sho pwa piti ethimbo, okwa ka adha ondhalate ya kuthwa ko nee thiluthilu nokutulwa pevi mpoka. Amutenya ota ti okwa shuna ko natango ku tatekulu Aipanda noku mu hokololela onkalo ndjoka yi li po.
Pokati mpoka Amutenya okwa ithanwa kOmbelewa yelenga enene lya Mbalantu tatekulu Oswin Mukulu, hoka Chief Mukulu e mu lombwele kutya ota yi mo moshinima she shika. Chief Mukulu okwa tumu ko omalenga ge ga ka tale uupyakdhi mboka.
Omalenga sho ga yi hoka, opwa kala gamwe taga ti oshinima oshi li nawa, kapu na uupyakadhi, omanga gamwe taga ti kashi li nawa. Sho omalenga ga galukile ku Chief Mukulu noku mu fatululila nawa shoka ya mona ko, Chief Mukulu aniwa okwa gama kwaamboka taya ti kutya oshinima oshi li ashike nawa ngawo, sho uupandainda wa za po nopu na ashike olaina yimwe yondhalate. Amutenya ota ti etokolo ndyoka ine li pandula nande, oshoka kali li pauyuki.
Ta ti ekonaakono nali shununwe mo natango. Meti 3 Apilili 2008, okwa ithanwa ku Chief Mukulu, ngoka e mu lombwele aniwa kutya itaku ka ningululwa we omakonaakono moshinima shika, oshoka oshi li nawa. Ta ti ondhalate yandje ndjoka ya tetagulwa po itayi futwa. Inashi oumbwa we a kale ta yi kombelewa ya Chief Mukulu, nange ote shi ningi ota ithanenwa Opolisi. Amutenya ta ti, Chief okwe mu tidha mo mOmbalewa nokwa pata po. Meti 7 Apilili 2008, Amutenya ota ti okwa tokola, a ye kOshigongi oshinene shElelo lyopamuthigululwakalo lya Mbalantu, ashike aniwa a li kuulika, ina pewa ompito a popye, sigo oshigongi tashi zi mo.
Okuza mpoka, okwa yi kopolisi, ndjoka ye mu tumu kUuministeli wOmavi. Uuministeli wOmavi owe mu lombwele kutya oshinima she, shondhalate ya yonagulwa kashi na sha nevi, oshi na sha neliko lya yonagulwa, onkee oshOpolisi. Opolisi oya fa nee ye shi undulila kElelo lya Mbalantu, ndyoka, pambapila yalyo ye ti 7 Auguste 2008, lyi itheta koonyala kutya, sho lya popya naamboka yomooShaumbwako, oya ti yo kaye na uupyakadhi na mushiinda shawo Kanyakelwa Aindongo. Tate Amutenya okwa ti kutya oshinima okwe shi lombwela wo na Gavena ya Musati ngoka a ti kutya Ombelewa ye nayo otayi shi konaakona.
 Amutenya ta ti nande ongawo, okwa tokola oshinima shika e shi nyanyangidhithe mOshifo opo oshigwana shi shi uve. Ta ti okwa hala ondhalate ye ndjoka ya futwa tuu.

---