Iihokolola ya undulilwa komeho

IIHOKOLOLA ta yi ningilwa aafekelwa yatano medhipago lyomunona omushona nekwato koonkondo lya yina oya undulilwa komasiku 24 gomwedhi nguka opo ya ka popye ngele oyena ondjo nenge ahawe.

Aalumentu mbaka otaya tamanekelwa  woo oku kwata ombambyona. Luciano Kalundjinji, Tozze Malanji, Abilio Epangenga na Frans Antonio ayehe aakwashigwana yaAngola na Johannes Haufiku omukwashigwana gwa Namibia oya holokele komeho gamengestrata Khaepriums Rynald Swartz, pOutjo oshiwike shayi. Aakwashigwana yaAngola oha ya zi mokamba yoontauki pOsire. Haufiku oye ta lundilwa a kwata omukiintu ngoka kenganga omanga yakwawo yane otaya lundilwa ya kwata ombambjona.
Omukiintu omugundjuka ngoka a thiki pohofa mpoka ta tina omanga ohofa ya li nale miipundi okwa kuutumba nokwa kala tiipuku komutse pethimbo lyiihokolola omanga ta tala nomeho taga tondoka omahodhi taga pononoka koompanda dhe. Aafekelwa ayehe oye li mondholongo.
Omukiintu nguka nomwana oya li taya kongo olefa yi yafaalele kofaalama ya Lemoenplaas, na oya li ya pewa andola olefa kaantu mbaka pomatsakaneno goondjila  dha Outjo, Khorixas Otavi. Aalumentu mbaka aniwa oye ya fala ketoto lyiiyagaya hoka omukiintu omugundjuka a kwatwa koonkondo omanga omutse gwomwanamati  gwa dhengwa kemanya  manga yina atala ko keena shok ta vulu oku ninga.

---