Euvathano lyo kulonga omandjembele naanafaalama lya teka

AANAFAALAMA yomandjembele omulongo pOmulonga gwaRange oya kuthwapo koonkondo piilonda yawo yomiviinu komutumwa gwohofa gwopoKarasburg metiyali oshiwike shika.

Ndele omunafaalama ashike gumwe gwomwaambaka omulongo oye a adhikapo sho omutumwa gwohofa eya oku ya tidha mo momagumbo noshowo momapya gawo gomandjembele esiku ndyoka. Nguka okwa li a thikama mpoka a tala sho omutumwa naaniilonga ye taya umbile iinima yaanafaalama mboka pondje yomagumbo gepangelo moka ya kala haya zi pethimbo yali taya longo omandjembele. Etidhomo momapya ngaka komutumwa, Andrew Walters olya ningwa kuna ashike oomwedhi mbali omanga omandjembele inaaga likolwa. Aanafaalama oyuuvite uudhigu sho taya tidhwa pethimbo ndika lili popepi neteyo, unene tuu sho ya longo nuudhiginini okukuna noku tekela iimeno yawo.
Oya ti ngashingeyi otaya tidhwa omanga inaa ya teya iiyimati mbyoka. Epangelo olya kongo elombwelo lyohofa yopombanda konima sho lya li lya hulithapo euvathano naanafaalama mboka aniwa sho yo ya yonagula euvathano , sho inaa ya landitha omandjembele gawo okupitila mehangano lyuulikwa kepangelo lyedhina Cool Fresh Namibia.Omatilitho kutya aanafaalama mbaka ota ya ka tidhwa mo moofaalama dhomandjembele oga tamekele omumvo 2010 sho mbaka ya landithile iilongomwa yawo yuukilila kehangano limwe lyoko Netherlands pehala lyoku ga landitha tashi pitile muCool Fresh Namibia. Aanafaalama oya ti iiyemo iishona mbyoka ya kala haya mono uuna ya landitha omandjembele gawo okupitila mu Cool Fresh osho sheya thiminike opo kaa ya pitile we muye uuna taya landitha.
 Oshinima shika osha li sha thiminike epangelo na Cool Fresh Namibia yangongepo euvathano lyopatatu okupanga olutandu pokati kayo naanafaalama , ndele ndika olya ekelwahi kaanafaalama, ya ti ndyoka kalya li muuwanawa wawo oshoka olya gandja okondolola yeinyengo lyiimaliwa yawo ku Cool Fresh Namibia.
 Omukulukadhi gwomunafaalama gumwe ngoka aadhikapo sho omutumwa gwohofa a thiki nokuumbamo iinima yawo megumbo lyepangelo, okwa gana kutya  ye ite kiinyenga nando okanano oku za po pehala ndyoka,Elizabeth Haith okwa ti ngele oya hala oku mudhipaga ota ya vulu okushi ninga ngaashi ashike sha ningwa ko South Afria, osho Haith a shongo aapolisi, mboka ya li taya talele etidhomo lyawo momagumbo gepangelo.
Okwa gana a ti ye ita zipo pepya lye shila ongele epangelo tali mufutu omolwa iiyimati ye mbyoka  a li a longele nomazigudhe ndele ota ku tiwa ne yi thigepo. Okwa pe epangelo ombedhi moku ya uvanekela enkondopeko noku ya longitha ya fa aapika ndele ngashingeyi otali ya tidha yafoombwa. Okwa ti epangelo lyaaluudhe  oli na uutondwe naaNama aniwa.
 Omunafaalama Josef Frederick okwa ti yo oya hogolola epangelo ndyoka ndele ngashingeyi osho tali ya longele ngaaka. Frederick okwa ti nkene a longele pofaalama ye ndjoka okwa mono mo oprofita sho a landitha  yemwene omandjembele ge. Okwa ti uule woomvula ndatu okwa longo itaa futwa okwoopaleka oshilonda she shomiviinu.
 Okwa ti epangelo olya ndopa oku ya nkondopeka. Okwa ti ehangano ndyoka hali landithapo omandjembele gawo olya kuthapo iiyemo yawo oyindji nolundji olye ya thigi iikaha yowala, ndele sho ya kambadhala okwiithikamena yoyene ngashingeyi oholomende oye ya tanaukile nokuyeethapo.Kansela gwoshikandjohogololo sha Karasburg, Paulus Ephraim ngoka a li ombangi  metidhomo lyaanafaalama mbaka okwa ti kena oonkondo dha sha okushi keelela. Okwa ti oshinima shika osha fala aanafaalama mbaka mehenene  ongo aantu yaana iilonga. Okwa indile opo epangelo li tale onkalo yawo, noku ya pa omahala gamwe gevi mpoka taya vulu okulonga omandjembele, opo uunongo wawo kauwu kane. Aanafaalama mbaka oya pelwe omadhewo uule womimvo ndatu mokulonga nokusiloshimwiyu omandjembele, nokonima yago oya pewa iilonda yomiviinu, mbyoka yo ya kokola yoyene okuza petameko.
Okwa li yuuvanekelwa kutya ota ya ka tulululwa momahala ngoka, ndele euvaneko ndyoka inali gwanithwapo.Konima aanafaalama oya ka ya meuvathano lyokulonga omahala ngoka uule womimvo ntano okutameka omumvo 2009. Okuza omumvo 2003 aanafaalama mbaka oya kala kehe gumwe ha teya iipakete yomandjembele yili pokati kiipakete 3 000 sigo 6 000 yondudno yookilograma 4,5 kehe shimwe, mbika ohayi tuminwa pondeje nokweeta iiyemo yoodola omayovi 300 000 noshowo 400 000.

---