Ethigathano molwoshilonga oshinene lya tameke ohela

OPOLITBURO yongundu yo Swapo oya tumbula aawiliki yaali yopombanda mongundu ndjoka opo ya thigathanepo molwa oshipundi shuupeviperesidende wongundu ndjoka.

Swapo okwa tumbula Hage Geingob na Pendukeni Iivula Ithana ongo ookandidate oku kondjela oshipundi shuupeviperesidende wongundu, opo ngoka ta ka mona oshipundi shoka oye ta ka landula omuperesidende, Hifikepunye Pohamba uuna oshikako shiilonga ye sha puko mu Maalitsa 2015.
Omadhina ngaka otaga ka kolekwa kongundumutima yoSwapo ndjoka tayi ka gongala kuyele omwedhi taguya. Opena woo ompito kutya okandidate ontitatu otashi vulika yi ka ulikwe pethimbo lyoshigongi shoka. Opena omipopyo kutya okandidate ndjoka ta yi ka ulikwa poshigongi shongundumutima  oJerry Ekandjo  ominista yoshikondo shOmalelo giitopolwa, iilando, omagumbo neyokomeho lyokomikunda.
Ekandjo okwa kala konyala ha hogololwa pondondo yotango ongo oshilyo shongundumutima pookongressa ndatu dho Swapo ndhoka dha ningilwe okuza kemanguluko.Oshifo shika osha kundana kutya omanga okuulikwa kwookandidate inaa ku tameka, Ekandjo okwa tseyithile oshigongi kutya ye ota tegelele sigo opethimbo lyoshigongi shongundumutima, opo a tokole ngele okwa hala oku ninga okandidate molwa oshipundi shuupeviperesidende. Omuperesidende Hifikepunye Pohamba okwa lombwele oshigongi kutya, Hage Geingo ngoka eli omupevi gwe pangundu yoSwapo okandidate nale yoshipundi shoka molwashoka oye omupeviperesidende gwoSwapo pethimbo ndi.
Ominista yIikwapondje, Utoni Nujoma okwa tumbula, Pendukeni Iivula Ithana ngoka a kolekwa ku Saara Kuugongelwa-Amadhila. Omuprima Minista Nahas Angula okwa tindi okuulikwa ongo okandidate ontitatu sho Helmuth Angula  popi edhina lye, a ti aniwa ye kena ehalo manga lyoku kondjela ehala ndyoka.
Kuyele Angula okwa tile ina hala oku thikama pehala ndyoka, ndele okwa ka popya motiivii a ti ngele aantu oye mu hogolola nena okwiilongekidha oku kondjela oshipundi shoka.Sho a pulwa ngele ota ka zimina okuulikwa kongundumutima yongundu molwa ehala ndyoka, okwa ti otaka popya sha uuna shoka shaningwa. Okwa ti ngele opena oyendji ya hala oku muulika ongo gumwe gwaaulikwa nena ote ke shi tala, ndele okuwete kiutya ethimbo lye olyaadha okuzimbuka, oshoka opolitika ha yo ayike iilonga. “Otandi vulu okulomgitha ethimbo lyandje okutunga omahupilo goshilongo, okuhumitha komeho uuyuki pankalathano, epalutho, noshowo ontseyo mokati kaagundjuka. Ngame omunangeshefa gwopankalathano, nda hala okulonga naantu oku ya kwathela moompumbwe nomashongo ge ya taalela.
”Pethimbo lyoshigongi shopolitiburo opwa hogololwa woo aaulikwa  yoshipundi shuuhamushangandjayi, mpoka Marco Hausiku a tindi okuulikwa ku Utoni Nujoma omolwa ehala ndyoka. Geingob ta tumbula Nangolo Mbumba omolwa ehala lyuuhamushangandjayi eta yambidhidhwa kopmupopi gwomoshigongi shopashigwana Theo Ben Gurirab. Otapa popiwa kutya aaulikwa yamwe ota ya ka ulikwa poshigongi shongundumutima omolwa ehala lyuuhamushanga ndjayi.
Gurirab okwa tumbula Netumbo Nandi-Ndaitwah ongo okandidate yuuhamushangandjayi gwopevi, omanga Iivula Ithana okwa ulike gavena gwOmaheke Laura McLeod Katjirua ongo okandidate poshipundi shoka. Ongundumutima ota yi ka manitha omusholondondo gwookandidate adhihe omolwa okongressa pehulilo lyomumvo na ota yi manitha woo iikundathwanwa poshigongi shoka.

---