Aanafaalama mOhangwena ya indilwa ya kutheko oondhalate

AANAFAALMA ye vule 17 muuzilo woshitopolwa Ohangwena oya lombwelwa ya kutheko omalugumbo goondhalate kolutu halu wilike evi lyaayehe moshitopolwa shoka pehulilo lyomwedhi nguka.

Nahas Ndevahoma, gumwe gwaamboka ya pewa elombwelo ndika okwa koleke shika noThe Namibian, kutya okwa taamba etseyitho ndyoka lya zi komunashipundi shoraata yevi lyokomikunda moshitopolwa shaHangwena, Daniel Hangula.
Elombwelo ndyoka olye ya adhele petameko lyomwedhi nguka. Melombwelo ndyoka mbaka ota ya lundilwa kutya oya tula omahala moka yeli, shaali pautho lyompango yevi lyaayehe yomumvo 2002, ndjoka tayi indike opo evi lyokomikunda li tulwe molugumbo pwaana epitikilo okuza kelelo lili mondjila. Hangula okwa londodha kutya mboka itaa iyutha kelombwelo ndika ota ya ka landulwa paveta.
Ndevahoma okwa ti mboka yaa uvitile elombwelo netokolo ndyoka ombili oya pewa ompito opo ya indile etokolo ndyoka litalululwe kwaamushangatakalele mOshikondo shevi meni lyomasiku omilongo 30. Ndevahoma okwa ti oyendji yomwaambaka oya ninga nale omaindilo gawo nombelewa yaamushanga ngoka  na oya tegelela ashike eyamukulo okuza kuye. Ndevahoma okwa ti etokolo lyoraata yevi lyaayehe kali li nawa  oshoka ndika ina li ya thika kuyele pena ethimbo.
Okwa ti aanambelewa  yoraata ndjika oya yi koofalama dhawo noku gandja omatseyitho ngoka kaasita yawo yiimuna pehala  lyoku kundathana tango nayo. Okwa ti yo ayehe oya li ya pewa epitikilo opo ya tule omahala gawo ngoka momalugumbo okugamena iinamwenyo yawo.
Elelo ndika olya lombwelele oshifo shika kuyele kutya aanafaalama mboka oya li ya pitikwa okuninga oofaalama pomahala mpoka niishewe okudhitula momalugumbo. Pethimbo ominista yopevi, yevi nomatulululo ya tulile miilonga ooraata dhevi lyokomikunda, miitopolwa Kunene, Omusati, Ohangwena, Oshana, Oshikoto pOngwediva  muMaalitsa nuumvo, Theo Diergaardt okwa li a indile opo oshinima shokutula evi molugumbo shi hulithwepo mbala. Okwa li eya londodha kutya  mboka ya tulako omalugumbo ngoka shaali paveta ota ya ka geelwa pautho lyompango.

---