Shatipamba ta wilike Swapo poAnamulenge

By: OSWALD SHIVUTE

AASWAPO moAnamulenge molyomakaya ga zi ko, oya hogolola aawiliki yawo yatatu yopombanda moshikandjo shoka noshowo mboka taya yi koshigongi oshinene shongundu shOmusati shoka tashi kala ko ngula mOlyomakaya pOutapi moka tamu ka hogololwa ewiliko lyopombanda lyoSwapo mOmusati.

Pauyelele mboka wa monika kOshifo shika, otawu ti, Junias Shatipamba oye natango a hogololwa a kale omuwiliki gwoSwapo moshikandjohogololo sha Anamulenge.
Aanamulenge oya hogolola wo iilyo mbyoka tayi ke ya kalela po koshigongi oshinene shoSwapo shoka sha thanekwa tashi ka kala ko pehulilo lyomumvo nguka koVenduka, pokati ka Novomba na Desemba.

---