Roads Authority oku na oongunga dhaana kondalaka

EHANGANO lyoondjila[Roads Authority] oli na oongunga dhomahangano ngoka ga pelwe iilonga okwoopaleka oondjila dha yonagulwa kefundja muumbangalantu woshilongo.

Ota ku hokololwa kutya iimaliwa mbyoka aankondalaka mboka ye na oku futwa oyo oomiliona 47,6. Petameko lyomwedhi nguka RA okwa li a mweneke manga iilonga yomahangano ngaka, ye ga lombwele kutya inaya tsikila we manga okupangela nokulongulula oondjila ndhoka dha li dha tewa komeya gefundja, molwaashoka aniwa kapena manga iimaliwa oku ga futa molwiilonga mbyoka.Amushangatakelele mUuministeli Wiilonga Niiyenditho, Peter Mwatile okwa koleke kutya  oshikondo she noshowo RA ha yo yena oshinakugwanithwa  oku gandja iimaliwa yokwoopaleka oondjila ndhoka.Okwa ti eopaleko netungululo lyoondjila osho oshinima shopampumbwe noKabinete oko haka topola noku gandja iimaliwa yokwoopaleka oondjila ndhoka.
Mwatile okwa ti RA ota ka tameka mbala neopaleko noshowo etungululo lyoondjila  ndhoka , na okwa indila nale Okabinete opo ka gandje iimaliwa ya pumbiwa.Omukuluntuwiliki gwa RA pakathimbo, Conrad Lutombi okwa li a indile omahangano ngoka gena iilonga mbyoka giidhidhimike omanga oshinima shiimaliwa yago tashi longwamo.
Okwa ti edhiladhilo lyoku longa oondjila ndhika kali shi ashike  okutungulula oondjila ndhika ndele oku dhi opaleka opo dhaa tewepo  kefundja monakuyiwa.Iilonga mbika otayi ka longwa miikako itatu.
Oshikako shotango osha tengenekwa tashi ka kotha oodola oomiliona 234, 8 ndele molwaashoka kapena iimaliwa ya gwana, shika osha pewa ashike oodola oomiliona 150.Iimaliwa mbika ya gandjwa ka ya li ya gwana oku manitha iilonga ayihe mbyoka. Okwa ti oomiliona 221 odha longithwa moshikando shika shotango, ndele oomiliona 60 dhiimaliwa mbika ina dhi futwa natango.
Mwatile okwa ti uupyakadhi owo oshimaliwa, nepangelo oli na uupyakadhi oku mona oshimaliwa sha gwana  oku gandja kehangano lya Roads Authority. Mwatile okwa ti uuna Okabinete ka zimina iimaliwa mbyoka yina oku gandjwa nena iilonga ota yi tameke pashiluku oshitiyali. Okwa ti pethimbo ndika oshikondo she inashi tseya kutya iimaliwa ingapi tayi ziminwa kokabinete. Ndele oshikondo she otashi ka gandja omiyalu ndhoka dha pumbiwa koKabinete omolwa iilonga yokwoopaleka oondjila.Kombinga yokugandja ootendela komahangano, Mwatile okwa ti RA ina gandja ooteendela ndele okwa pula okupewa omitengenekwa miyalu oku za komahangano unene sho iilonga yokwoopaleka ya li yeendelela,RA ka li nompito yilwe ndele oku gandja iilonga komahangano opo goopaleke oondjila noku pupaleka omainyengo gaa longithi yoondjila ndhoka.

---