Oshakati Premier a gandja Oomiliona ndatu nasha

By: OSWALD SHIVUTE

MOSHIGONGI shayo shokomumvo sha ningilwe Omaandaha goshiwike shika mOshakati okampani ndjoka hayi gandja olusheno kondoolopa ya Shakati yedhina Oshakati Premier Electric, ya gandja oodola dha Namibia, oomiliona ndatu oshinkwanyu ndatu (N$3,3million).

Omunashipundi gwOlutu ndoka halu wilike okampani ndjika ya Shakati Premier Electric, Engelbert Atshipara, ta yambidhidhwa komunambelewa omukuluntupitithi gwa Premier Electric, Fillemon Nakashole, oye a gandja oshimaliwa shika ku Meya gwaShakati  Onesimus Shilunga, ngoka a li pamwe nomupeha gwe, Katrina Shimbulu nomunambelewa Omukuluntupitithi mElelo lyOshakati, Werner Iitha.
Moshipopiwa she sha leshwa pehala lye koshilyo shimwe shOlutu Oluwiliki lwa Premier Electric, Jan Greyling,  Atshipara okwa lombwele ayehe yiile koshiithanene shokutala sho Premier Electric ta gandja oshimaliwa shika kOmukuluntu gwe Elelo lya Shakati, kutya nonando okampani yi na omashongo ogendji gopamona, oya kondja nokugwanitha po shoka yi na okugwanithila po oshigwana nelelo lya Shakati. Oshigongi shoka, osha kundathana wo kombinga yEhokololo lyElongitho lyIimaliwa kOkampani ndjika pamumvo gwa hulile meti 30 Juni 2011 noshowo ehokololo lyomukondololi nomutjekindjayi gwElongitho lyIimaliwa yOkampani. Omahokololo ngaka oga etwa po ku gumwe gwomaanambelewa aakuluntu mo Premier Electric, Nelson Sheya. Atshipara okwa tseyitha wo kutya omumvo gwa zi ko, Premier Electric okwa dhanene evalo lye lyoomvula omulongo ta gandja olusheno koshigwana sha Shakati kumwe nelelo lyasho. Atshipara ta ti momimvo ndhoka dha pita po Premier Electric okwa longa oshindji shokugandja olusheno kondoolopa ya Shakati nokoshigwana sha mo.  Atshipara, ngoka a kala uule wethimbo Meya gwOshakati, sigo ta zi mo moshikando sha zi ko, ta ti Premier Electric muule wethimbo alihe ndyoka okwa kala ta indile a pewe olisenisa ye mwene yokulonga iilonga yegandjo lyolusheno kAashakati, ashike sigo oompaka ine yi pewa, noha longo ashike naandjoka ya NORED, yuule woomwedhi 18. Nande ongawo, Atshipara ta ti, Premier Electric okwa eta po omalamba omaleeleka momalukanda ngashi mOkandjengedi, moshitopolwa oshiti 15 nosho tuu. Pokati mpaka okwa tula omarobota pomatskaneno goondjila onene lwopongalashe yomahooli ya, Shali naandjoka ya Iyambo Iyambo. Ta ti iilonga ayihe mbyoka oya kotha Premier Electric oodola dha Namibia oomiliona omugoyi (N$9million). Shoka inashi enda nawa nuumvo ku Premier Electric osho shoka sheshuno pevi lyoprofita, ndjoka nuumvo, a mono ko ashike oodola dha Namibia omiliona yimwe oshinkwanu hetatu (N$1,8million) okuyelekanitha naandjoka yomumvo gwa yi yoodola dha Namibia oomiliona ne oshinkwanu hamano (N$4,6million). Nande ongawo, Atshipara okwa ti kutya oye na einekelo lya kola kutya Premier Electric ota tsikile noku shi enditha nawa mokugandja olusheno koshigwana sha Shakati nokuyambidhidha ngeyi Elelo lya Shakati moshinima shika.

---