Omunona omushona a dhipgwa shi nyanyalitha pOutjo

EDHIPAGO linyanyalitha lyomunona gwoomwedhi 18 aniwa koontauki dhAngola dha za kokamba yoontauki pOsire olya halutha oshigwana shomOutjo.

Omukulukadhi nomwana  oya li taya kongo olefa oku ya kofaalama hoka ye a li ha longo sho a ningi oshihakanwa shaantu mboka taku fekelwa ya li ashike ya hala okanona ke. Oshiningwanima shika osha ningilwa pomatopokelo gondjila ndjoka ya za mOutjo okutanauka oku ya koKhorixas, pehulilo lyomwedhi gwayi.
Oontauki dhili ne dhAngola nomu Namibia gumwe oya holokele mompangu ya mengestrata pOutjo Omaandaha oshiwike shika ta ya tamanekelwa edhipago noshowo ekwato koonkondo. Aafekelwa mbaka oya li yena oku gamenwa kopolisi oshoka oshigwana shondoolopa ndjoka osha li sheya geela noonkondo, tashi igidha kutya, oshagwana, oshagwana.
Aakwashigwana yAngola , Luciano Kalundjindji, Toze Malanji, Abilio Epalanga, na Frans Antonio Abel ota ya tamanekelwa edhipago, omanga omukwashigwana gwa Namibia, Johannes Hausiku ota pangulilwa ekwato koonkondo. Oshipotha shawo oshuundulilwa kesiku lyotango lyAuguste nuumvo.Pahapu dhomupolisi, Warrant officer, Benestus Vehumba Hoveka okwa ti yina yomunona ngoka okwa patulula oshipotha eshi ningile momasiku 31 ga May nuumvo, posasiona yopolisi  pOutjo, Omukiintu nguka okwa li a haluka nokwa li ena oku taambelwa moshipangelo omanga inaa gandja ehokololo lye.
Okwa ka lombwela opolisi esiku lya landula kombinga yoshinima shoka. Okwa fala opolisi ndjoka pomahaala gatatu , mpoka a li itaala kuty aopo pwa dhipagelwa omunona gwe.
Ndele opolisi oye kiitsa pehala lyomondjila mpoka pwa dhipagelwa omunona ngoka.Aalumentu mboka yatano aniwa oya kwata omukiintu ngoka nokamwana pondjila ndjoka yuuka ko Khorixas noya hingi pamwe naye mosheenditho , yuuka melundu, no ya mangele omukiintu ngoka mekota lyomuti.Uusiku mboka Aangola mboka  ye li ya ne oya kutha okanona kadhona hoka ye ka kwata koompadhi nokudhenga omutse gwako iikando oyindji komamanya.
Hausiku aniwa sho a mono shoka tashi ningwa okwa mangulula omukiintu ngoka nokwa fadhukapo naye yuuka ketoto lyiiyagaya molukanda lwa Etoshapoort, mpoka opo ya lala uusiku mboka.
Omukiintu ngoka okwa lundile, Hausiku kutya okwe mu kwata koonkondo ethimbo ndyoka, konima sho mbaka yaali ya galukile moshilamndo. Hausiku okwa kwatelwepo kopolisi  momasiku ga 8 ga Juni nuumvo. Esiku lya landula omudhimba gwoola gwokanona hoka ogwiitsuwa, gwaana omutse.
Omutse ngoka ka gwa li guna omeho, omakutsi noshowo oshipala, ndele kape shiwike kutya iilyo yolutu mbyoka olye eyi kuthako komutse, ngele iikwakuti nenge pamwe aantu. Konima yokwaadhika komudhimba ngoka , aakwashigwana yane yaAngola oya kwatapo kopolisi. Omaandaha oshigwana oshindji osha li sheya kohofa  oku ulika uukwawo wa nankali na yina yomunona ngoka.Opolisi ota yi tsikile nomakonakono moshinima shika.

---