Omaiyuvo kombinga yoshinima shaanona ya shewa

OMUPOPYO gwa Leitenanda Ndjayi, Martin Shalli naangoka gwOmuprima Minista Nahas Angula kutya aanona ya valelwa pondje yoshilongo pethimbo lyekondjelomanguluko aantu yashewa na ishewe oyo aathigululi yoshili yemanguluko lya Namibia, ogwa talikako kaantu ya yooloka nomaiyuvo ga yooloka. Shalli na Angula oya popile, oohapu ndhoka pokongressa ya Namibian Exile Kids Association ya ningililwe moVenduka oshiwike sha yi.

Poshigongi shoka  Shalli okwa tile opena oku ningwa eyooloko pokati kaanona mboka naamboka ya valelwa meni lyoshilongo, a ti mboka ya valelwa muupongekwa oyo aantu ya shewa na oye na oku talika ko noku longwa nayo moku ya tala ngaaka.Ongundu yo Congress of Democrats oya ti omupopyo ngoka otagu tukana niishewe ogwo iifundja no shinima shaa na oshilonga. Omanga Katuutire Kaura gwo DTA okwa ti ota tsu kumwe neiyuvo lya Shalli kutya aanona mboka oya shewa, ndele okwa ulike kutya aanona ayehe ya Namibia oyo aathigululi yemanguluko lyoshilongo shika.
Nahas Angula okwa popile poshigongi sha Neka, ngoka ena eitaalo kutya oshilongo shika oshi ya na ongunga, molwa omatompelo gaashiwike. Omanga omukwiita eli moshipundi shevululuko, Leitenanda ndjayi, Shalli okwa luku aanona mboka aantu yashewa, noye na oku longwa nayo ngaaka.Amushangandjayi gwo CoD, Tsudao Gurirab okwa ekelehi omipopyo ndhoka.Kombinga ye amushangandjayi gwe hangano lyopashigwana lyaagundjuka, Mandela Kapere okwa ti ita tsu kumwe nomupopyo gwa Angula kutya mboka ya valelwa muupongekwa oyo awike aathigululi yoshili yemanguluko lya Namibia.
Kapere okwa ti omupopyo ngoka ota shi vulika gweete etopoko mongundu ta yi pangele. Kapere okwa ti ye okwiitaala kutya aanona ayehe aaNamibia oyo aathigululi yemanguluko lya Namibia.
A ti sho iita yemanguluko ya kondjwa oya hingwa oku mangulula omu Namibia kehe.Okwa ti nando kena uudhigu naamboka ya valelwa muupongekwa, okwa hala oku shuulika kutya aaNamibia oyendji oyena aakuluntu mboka ya li ya hepekwa noonkondo pethimbo lyekondjelomanguluko.
Okwa tsikile a ti kena uupyakadhi nomupopyo gwa Shalli, ati aanona yomekondjelomanguluko oya shewa, ndele shika osha hala okutya ngiini. Osha hala okutya iilonga mepangelo  ota yi mwenekwa, yo yi ikalekelwe aanona mbaka. Osha hala kutya mboka twa valelwa meni lyoshilongo katu shi aathigululi yemanguluko ndika.
Kaura ngoka a ti na ye okwa li muundjendi, okwa ti aanona mboka oya shewa molwaashoka oya valelwa muundjendi moka ya li ya taalelwa komashongo ogendji omanga yo aashona.Ndele nee aanona ayehe ya valwa pethimbo lyemanguluko moNamibia oyo aathigululi nooyene yoshilongo shika.
Tsudao Gurirab gwa CoD okwa ti oshili  oondjika kutya aaNamibia oya kala ta ya kondjitha uukoloni oku za ngaa nkene wiilemo moNamibia omumvo 1880. Omwaalu omushona gwaaNamibia ogwa yile muundjendi oku ka tsikila ekondjo ndyoka nomiklao dhiili kohi yo Swapo. Omanga omwaalu omunene gwiilyo yoSwapo nayalwe ogwa kala meni lyoshilongo, gwa tsikila nokulongekidha, oku kongela o Swapo iilyo  noshowo okuhwahwameka meni lyepunda lyemwanka.Onkene shoka ya gandja kemanguluko lyaNamibia, ina shi talika ko ongo oshinima shaantu yeli mongundu ontiyali nenge ontintatu. Gurirab okwa kumike Neka opo a kale ehangano lyaagundjuka ta li humitha komeho uuwanawa wiilyo yalyo.
Wo uuwanawa mboka ina wu longithwa oku monika yeli popepi nepangelo shaashi ashike ya hala oku ningilwa nawa ku holomende.Gurirab okwa ti woo mbaka oya pumbwa oku koka, noku tameka taya longitha oopolograma tadhi adhika miikondo yepangelo opo  ya humekomeho. Okwa indile woo epangelo opo li koke noku sila aantu ayehe oshimpwiyu.

---