Olutu lwe lundululo lyevi moshilongo lwa dhikwapo

OLUTU lunasha nokutala nkene evi tali lundululwa nenge nkene mboka yeli pumbwa ta yeli pewa olwa dhikwapo oshiwike shika moVenduka. Olutu nduka oluna iilyo yi li omilongo 29 ya za miitopolwa ayihe yoshilongo shaNamibia, kokutya moshigwana, noshowo wo maakwashigwana.Oluna elalakano lyokweendeleleka elundululo moshinima shoku topola evi noku li gandja kwaamboka yeli pumbwa okuza kwaamboka yeli na.

Edhiladhilo lyokutotapo olutu nduka olya li lya tulwa poshitaafula omumvo 2003, na olya yumudhwapo  nee nuumvo omolwashoka evi ndyoka lya gandjwa oku za kwaamboka yelina oku ya kwaamboka ye li pumbwa olili eshona. Sigo omomumvo 2009 mu Novomba, oofaalama eyovi 1305 dhuunene woohektara oomiliona hamanao odho adhike dha gandjwa kwaamboka yeli pumbwa.Oofaalama ndhika odha gandjwa okupitila melanditho lyoludhi lwo Affirmative Action Loan Scheme[AALS], nadhimwe oondhoka dha gandjwa oku pitila metulululo noshowo oku pitila melando lyopaumwene.Uuministeli wevi owa hala oku landa evi  lyoohekatala omayovi 534 000 komumvo kehe  oku za omumvo 2009/10 sigo 2011/12. Omumvo 2004 epangelo olya li lya kambadhala oku landa evi pathiminiko, ndele olya ka mona kutya shika oshina ondilo noshowo ohashi kwata ethimbo okushi manitha, yo ondando yoofaalama ndhoka oha yi tulwa pombanda kooyene yadho.
Omupekaapeki, Klaus Schade okwa ti pamukalo nguka uuministeli owali we shipondola oku landa evi lyoofaalama lyuunene wohektara dhili omayovi 70 000 meni lyethimbo ehupi. Ominista Yevi nomatululo, Alpheus Naruseb okwa ti olutu lunasha nelundululo lyevi, olwo ehala mpoka oshigwana tashi tala ngele omukalo ngoka gwa longithwa oku kongela aantu mboka ya pumbwa evi ogwa ende nenge ota gu adha omalalakano gagwo nenge ahawe. Nongele ina gu adha iilalakanenwa yago , olutu nduka ota lu kathanekapo gulwe nenge dhilwe ndhoka tadhi vulu okulongithwa opo oku gandjwa kwevi okuza kaanafaalama mboka ye li na ngashingeyi  ku kale okupu noku na ondando yi li hwepo. Amushanga muuministeli wevi , Lidwina Shapwa okwa ti elundululo megandjo lyevi moNamibia ota li ende hwepo okuyeleka miilongo yimwe yA frica napalwe muuyuni.
Olutu nduka ota lu ka kwathela mokuulika ongundu yoofaalama ndhoka tadhi landithwa. Oshinima shika otashi ka hwepopeka einekelo lyaapunguli moshilongo muka. Omuwiliki gwelundululo lyevi muuministeli wEvi, Knox Imbuwa okwa ti olutu lwevi ota lu ka taambathana uuyelele wu nasha  nomathaneko gepangelo kutya ogenipo kombinga yelundululo lyevi noshowo ota lu gandja omadhiladhilo gaakalelipo yaayehe mboka ya pumbwa evi. Olutu nduka oluna aakalelipo ya za komahangano agehe moshilongo genasha nevi, gepangelo naangoka gaashi gepangelo.

---