Muni a teyapo ishewe uumbashu po wumwe Goreangab dam moVenduka

OPOLISI ya Venduka oya longitha ombakumbaku yo ku tula omavi moololi okuteyapo omagumbo giipeleki ngoka ga li ga tungwa momudhingoloko gwa Goreangab Dam shaali paveta.

Omukunda moka omagumbo ngaka ga tewapo oguli moshikandjohogololo sha Samora Machel moKatutura. Pokati komutenya metitatu omagumbo gahetatu oga li ga teyagulwapo nale, omanga aanambelewa yopolisi ya li woo yiipyakidhila noku gongela po oongodhi dholusheno ndhoka, ooyene yomagumbo ngoka ya li ya kuthitha olusheno koongodhi dha muni.
Oshinima shika konyala shi ete uupyakadhi sho omukiintu gumwe gwomaantu mboka ya li ya tala sho omagumbo gawo taga undulwapo kombakumbaku, eyi umbu nemanya ndyoka lya tatula ekende, naashika osha thiminike aanambelewa ya shunithe ombakumbaku ndjoka nokweetapo yimwe. Nakuumba ombakumbaku ina kwatwa oshoka okwa yi mokati kooyakwawo nokuholama.
Gumwe gwomwaamboka omagumbo gawo ga undulwapo, Matheus Shikongo okwa ti yo aniwa kapena esiku ya pelwe etseyitho kutya na ya zepo pehala mpoka, ishewe kapena esiku ya lombwelelwe kutya otashi vulika ngele ina ya zapo taya ka undulwapo koonkondo.
Okwa ti oshinima shoka oshiiwinayi , noshikwawo yo kaye shi kuty ngele oya zi po mpoka ota ya uka peni, unene tuu sho yaana oshimaliwa okufutila omahala goku hiila palwe.
Ishewe omahala ngoka muni a tula omayakulo ngaashi omeya, oondjila nolusheno ogena ondilo unene, naashika oshe ya dhigupalele oku mona omahala mpoka taya vulu okutunga omagumbo gawo.Shikongo okwa ti ehala ndyoka mpoka pwa tungwa omagumbo giipeleki kuyo opwa li ashike iihwa oyindji konyala omimvo mbali netata dha pitipo, omanga oonakwiikuthila inaa ya opalekapo noku kokolapo.
Aili Johannes[21] okwa endulula shoka sha popiwa ku Shikongo kutya ka ya li ya londodhwa kutya omatungo gawo giipeleki na yilwe ota ga ka undulwapo kombakumbaku. Johannes okwa kanithilemo etungo lye moka a li ha landithilemo uuleke, omaapela, nonyama. Okwa indile opo aanambelewa ya muni ye yeethe, oshoka ka yena we ehala mpoka taya vulu oku ya noku tunga omagumbo gawo.Kansela gwa Samora Machel ,Abisai Hangula okwa li a tsakanene noonaku teyelwa po omagumbo nokukundathana nayo noshowo okwa ti okwa  li a kambadhala oku kundathana nopolisi opo yi stope  oku teyapo omagumbo ngoka. Hangula okwa ti okwa ninga oonkambadhala, adhihe.
Okwa ti omukalo ngoka aantu  mbaka ya longwa nayo kagu shi omwaanawa.Okwa thaneke kutya ngele opena uupyakadhi nena aantu oya pumbwa oku ya pamwe eta ya kundathana shoka shina okuningwapo okwaadha etsokumwe. Ndele pehala lyaashoka opolisi ota yi yonopo ashike omaliko.
Ndele omuwiliki gwopolisi,Gerry Shikesho ngoka oye a li ta wilike iilonga mbyoka okwa ti ooyene yomagumbo ngoka oya li ya pewa ethimbo lya gwana noshowo elondodho kutya omagumbo gamwe otaga ka tewapo. Okwa tiskile a ti yo oye lilepo oku kwatha aantu, onkene ngele aantu mbaka oye ya indile opo ya pewe ethimbo oku dhikulapo omahala gawo ngoka andola nena mbaka ota ye shi ningi. Shikesho okwa ti uumbashu owindji owa li wa tulwa ondomo ontiligane tayi ulike kehe egunbo lya dhikwa shaali paveta kutya olina oku dhikulwapo. Shikesho okwa ti ishewe iipeleki oyindji mbyoka ya dhikwa mpoka oya tulwapo ongo oongeshefa unene tuu dhokulanditha omalovu.
Okwa ti uumbashu wuli omulongo womwaamboka wa tewapo owa li woku landitha omalovi.
 Oshikwawo aantu yamwe aniwa oya kala taya landitha po omahala gevi, nomukiintu gumwe gwaamboka yeshi ningi aniwa okwa li a kwatwa metiyali, naantu oyendji oya tegelelwa oku kwatwa moshinima shika.Popepi nokambashu kamwe komalovu ka li taka tewapo opwa li pwa thikama omulumentu gwontumba ngoka taku fekelwa oye mwene gwako.
 Omulumentu nguka eya pehala mpoka nohauto yo Toyota Hilux nokashina kolusheno okwa ti aniwa okwe ya po molwaashoka okwa li a indilwa kukuume ke eli kuumbangalantu opo emu kwathele.
Okwa ti ye omunangeshefa, ndele ehala ndyoka lya tewapo kali shi lye. Okwa tindi woo okutumbula edhina, kakele kokutya okuna egumbo molukanda lwa Hochlandpark, na oku na woo aniwa ofaalama, ndele shoka she mweeta mpoka aniwa osha li ashike oku kwatha kuume ke.Ndele aanambelewa yopolisi ota ya ti ombashu ndjoka oyi na oku kala ye.
Oshilyo shimwe shokomitee yehumokomeho moshikandjohogololo sha Samora Machel osha pe ewiliko lya muni gwa Venduka uusama  sha ti muni iha gandja omahala  ngoka goopalekwa nale opo aantu ya tulepo omagumbo gawo.
Okwa ti muni gwa Venduka okwa ndopa moku gandja omayakulo kaantu. Okwa thaneke kutya ookansela ya Venduka ya talelepo omalukanda ngoka giipeleki oku tala onkalo moka aantu mboka haya zi moka yeli mo.

---