Kamwi okuuvite oluhodhi kelongitho lyiingangamithiM

INISTA, Richard Kamwi ota ti elongitho nayi lyomalovu noshowo lyiingangamithi olya ninga oshinima oshiwinayi notashi etitha omaipulo moshilongo. Kamwi okwa popi ndhika a ti shika osha ulikwa kiiningwanima sho aantu oyendji taya kwatwa kopolisi ye na iingangamithi konyala oshiwike kehe.

Okwa ti omolwa iiningwanima yoludhi ndoka oshikondo she shUundjolowele osha tokola oku koleka ooprograma dhasho oku ya moshipala onkalo ndjika oku keelela uuwinayi mboka hawu etwa kiingangamithi nokelongitho nayi lyomalovu.
Kamwi okwa ti iilonga iiwinayi mbyoka oyindji ta yi longwa moshilongo oyi na ekwatathano nelongitho nayi lyomalovu niingangamithi.
 Omiyonena ngaashi, elongitho lyoonkondo momagumbo, iilonga yomiyonena, eidhipago, onkalo ombwinayi, noshowo ekwato koonkondo oyo iizemo yelongitho lyomalovu niingangamithi.
Kamwi okwa ti omashongo ngaka itaga vulu oku longwa nago koshikondo she osho ashike ndele oga pumbwa woo ekwatho okuza ngaashi kOshikondo Shegameno nepopilo lyoshilongo, omagongalo, aawiliki yopahedhi naamboka yomoshigwana.Okwa londodha kutya omalovu otaga yonopo onakuyiwa yaanona, mboka taku kundanwa kutya  oha ya longitha iinima mbyoka.
Okwa indile aakuluntu yaanona mboka opo ya longe ya manamo oku shonopeka noku kelela oyana oku ninga iihakanwa yiingangamithi. Okwa indile opo oondingosho dhomalovu dhi kale tadhi  talwa nawa.Epopyo lye olya landula omakemo ga ningwa kiilyo yilwe yoparliamende kombinga yelongitho ewinayi lyiikolitha.
Omupopyo gwe ogwa ningwa mesiku lyopaigwana lyokukondjitha elongitho lyiingangamithi noshowo oku yi landitha.
Kamwi okwa tseyitha woo kutya esiku eti 24 lya Juni ota li kala esiku lyopashigwana lyaana elongitho lyomalovu omumvo kehe.
Kamwi okwa popi kombinga yelongitho nayi lyomalovu niingangamithi omanga oonakulanditha yomalovu yali ya gongala moWanaheda metitatu oshiwike shayi taya nyenyeta sho opolisi ya pata oondunda dhawo ndhoka dhaana oombapila dhoku landitha omalovu momalukanda gomoVenduka.Ishewe opolisi oya kwata aantu yena epangwe .

---