Eshangitho lyaa hogololi lyuundulilwa komeho

OKOMMISSI yOmahogololo ya Namibia oya lundulula edhiladhilo lya yo oku shangitha aahogololi ayehe moshilongo nuumvo. ECN okwa li a thaneka oku tameka noku shangitha aahogololi ayehe pokati ka Kotoba na Novomba nuumvo, ndele ethaneko ndika olya undulilwa komeho sigo okomumvo tuuka.Omunashipundi sha ECN, Notemba Tjipueja okwa tseyithile oongundu dhopolitika oshiwike shayi kutya, omashangitho ngoka ita ga ningwa we, opwa tegelelwa oka kommissi ko ku tenda iitopolwa hogololo ka ulikwe. Okakommissi haka ota ka kuutha ngele oongamba dhiitopolwa noshowo dhikandjohogololo otadhi tsu kumwe natango nekotampango noshowo nooveta dha guma oshinima shika shomahogololo.

Okwa ti konima sho iilonga yokakommissi kokutenda yapu opo eshangitho lyaahogololi ta li ka tamekwa nalyo. Okakommissi koludhi nduka olundji oha ka kwata oomwedhi omugoyi opo ka manithe iilonga yako.
Etokolo lya ECN, ota li kondjitha etseyitho lyomuwiliki gwomahogololo, Moses Ndjarakana ngoka a tile omashangitho gakwaalukehe gaahogololi otaga ka ningwa nuumvo nonando oveta yomahogololo oya li yina oku lundululwa.Pamautho goveta yomahogololo, oshilongo oshina oku ninga eshangitho lyakwaalukehe lyaahogololi ayehe moshilongo konima yomimvo omulongo kehe. Eshangitho lyoludhi nduka olya ningilwe mu Juli 2003 sigo Auguste 2003, onkene omashangitho goludhi ndoka ota ga ka ningwa ando mu Auguste 2013.Oveta yomahogololo ndjoka ya li ya lundululwa koparliamende oya pala ondjila opo pu ningwe eshangitho lyaahogololi ayehe moshilongo ishewe.
Ndjarakana okwa li ati omashangitho ngoka oga thanekelwa mu Kotoba na Novomba nuumvo.
Eshangitho ndika ngele ando olya yile komeho andola olya kala lya kankamekelwa koveta yomahogololo ndjoka onkulu, yina omautho gamwe ngaashi ndyoka ta li ti omwiishangithi ota vulu okwiishangitha nomishangwa dhegano dha za kaantu yaali yiishangitha ongo aahogololi mboka taya ti oye mu shi kutya olye.
Tjipueja okwa ti ECN opamwe nominista yomalelo giitopolwa oya tumine omuperesidende, ethaneko lyokuulika okakommissi kokutenda iitopolwa, hoka kena woo oku ziminwa koparliamende.Okwa ti onkene opena ethimbo lya gwana natango osigo omu August 2013 oku tameka eshangitho lyaahogololi ayehe.
Omunashipundi sholutu lwokutalulula ooveta, Sacky Shangala okwa ti elundululo moveta yomahogololo ota li ka tulwa komeho goparliamende kuyele omumvo tuuka. Pamautho goveta ndjoka aakwashigwana ya Namibia ota ya kiishangitha ongo aahogololi taya longitha ashike uumutse wawo.

---