Enwethemo lyopapolitika momahangano gepangelo

EWILIKO netalelo kutya omahangano gepangelo ota ga longo nawa kali li naanaa nawa nomathimbo gamwe enwethemo lyopolitika oha li dhigupaleke iilonga yomawilikongundu gomahangano ngoka mokulonga iinakugwanithwa yago.

Ngaka omadhiladhilo gOmuwiliki omukuluntu gwa Old Mutual Africa Operations, Johannes !Gawaxab, pethimbo a popitha oshigongi shewiliko lyoshimaliwa shoshigwana moVenduka oshiwike shika. !Gawaxab okwa ti omahangano omashona gepangelo ogo gena omawilikongundu taga longo nawa. Okwa ti poompito odhindji omahangano ngoka oga gamenwa kokundopa.
Okwa ti ngaka ina ga pitikwa okumbangolota omolwashoka epangelo oha li ga hupitha membangoloto. Okwa ti ngele ando oga nyengwa oku longa iilonga yago , andola opena ompito yago oku landithwapo, shoka tashi vulika ngele ando, oga longe ongo omahangano gopaumwene. Ndele ompito yo ku landithapo ehangano lyoholomende iha yi popiwa nenge yi thanekwe.
!Gawaxab ngoka woo eli omunashipundi shewilikongundu lya Namibia Petroleum Corporation okwa ti molwaashoka omahangano ngaka kagena uumbanda wokundopa miilonga yago, olundji omawilikongundu gago ohaga kala ga fa gaanako nasha.
Okwa ti oshinima shoku tala kutya ewilikongundu olya longa iilonga yalyo, ewiliko lyesiku kehe olya longa iilonga yalyo, oshinima ashike shili momishangwa dhoveta ndele shika osha fa ihaashi tulwa miilonga ngaashi sha thanekwa.
Shoka shiwetike ooshika kutya oku tula ewilikongundu noshowo ewiliko lye hangano koshiyelekitho noku tala kutya olya longa ngaashi sha tegelelwa oshinima  shaa uvitike , no ihashi tulwa miilonga.
Oshi  shiwike kutya aanambelewa mboka yena okuwilika omahangano gepangelo oye na oku kala yeshi shoka taya ningi, ishewe iilyo yewilikongundu na yo oyina oku kala yishi shoka tashi ningwa mehangano ndyoka yo yuulikwa yi wilike, mokweetapo omilandu.
!Gawaxab okwa ti ndele oshinima shokuulika aantu mbaka pa politika ethimbo limwe otashi nkundipike  oshinakugwanithwa shoka. Ishewe epangelo sho lili olyo mwene gwomahangano ngoka oli na iinaku gwanithwa yomaludhi ga yooloka. Ngaashi okutotapo omilandu kombinga yimwe nokombinga onkwawo oku tala kutya omilandu odho tuu ndhoka odha tulwa miilonga.

---