Aasitangombe moshitopolwa shUukwangali ya ti ka yena ondjo

AASITANGOMBE 25 yomaasita ye li 29 taya lundilwa oku litha oongombe dhawo shaali paveta mehala lili kohi yelelo lyopahedhi lyaUukwangali oya ti ka yena ondjo momatamaneko ngoka ta ya ningilwa petameko lyoshipotha shawo omaandaha.

Aatamanekwa mbaka oya holokele mohofa yomoshitopolwa sha Kahenge, ta ku tiwa aniwa oya li ya litha iimuna yawo mehala lyUukwangali yaana epitikilo lyomukwaaniilwa gwaahoka, Sitentu Mpasi okuza omumvo 1992. Omukwaniilwa Mpasi okwa li a ningile  ongundu yaasitangombe mbaka oshipotha omumvo 2006 naambaka oya holokele lwotango mohofa momasiku 3 ga Desemba 2006.
Yane yomaatamanekwa ka ya li mohofa oshoka oya li yaa uvite nawa, noshipotha shawo otashi ka pulakenwa momasiku 23 Auguste 2012. Omutamaneki ndjayi, Martha Imalwa oshiwike sha yi okwa tindi oku hokololitha aatamanekwa yaheyali molwaashoka mbaka aaKwangali na ota ya vulu oku longitha ehala ndyoka oku litha iimuna yawo.
Mbaka oyo Erastus Sakaria, Emilia Nghilundilwa, Metumo Nghilundilwa, Eli Shingwalulu, Aktoffel Sakaria, Seth Kaukungwa, na Juniors Hamana.
 Omutamanekwa gumwe, Petrus Mutilifa okwa mana oondjenda omanga a tegelela iihokolola.
Ombangi yotango yepangelo ndjoka ya holoka miihokolola mbika o detective warrant officer, Thomas Kautondokwa ngoka a lombwele ohofa kutya ye opamwe nayakwawo ya heyali oya pewa elombwelo  komukuluntu gwopolisi, Leitenanda Ndjayi, Sebastian Ndeitunga opo ya ka konakone oshinima shokulitha shaali paveta sha gandjwa komukwaniilwa Mpasi.
Okwa ti oya talelepo omikunda poSazi, Okolo, nOngali, mpoka yaadha iigunda yoongombe, oondunda nomapya giilya gaaWambo mboka woo oyo oyene yoongombe. Kautondokwa okwa ti aanaafaalama mboka yemu pe omishangwa gano oya ti yo ya li pehala mpoka shi li paveta na oya li haya futu iifendela kelelo lyopahedhi lyUukwangali.
Hahende yoonaku tamanekwa, Norman Tjombe okwa ti omatamaneko gokulitha shaali paveta kageshi goshili, oshoka aantu mboka oya li ya litha iimuna yawo mehala ndyoka shi li paveta.

---