Oshiponga komunkulofuta gwa Namibia sha dhipaga yahamano

AANTU yahamano oya si moshiponga shekandomo lyokambautu koku yula oohi kuumbangalantu wa Mile 4 etine oshiwike shayi.

Mwene gwokambautu hoka nakusa, Danie Kloppers ota ku hokololwa a yi pamwe naaniilonga ye yahamano ngaashi shito komatango getine oku ka kwata oohi, ndele esiku ndyoka oya adhika koshiponga sho owato yawo aniwa  ya tameke oku ya omeya  noya dhengwa kombepo ondhigu nongeyi oya kandoma pahapu dhopolisi yomoshitopolwa shErongo.
Inspector George Xoagub okwa ti oshinima shoka osha ningwa omanga owato ndjoka ya li mondjila oku galukila koShiwakop. Omuniilonga gumwe awike, David Alweendo oye a hupu molwaashoka okwa li a zala ondjakete yokwiihupitha nokwa vulu oku yoga  sigo oko mutunda, ndele ooyakwawo yahamano oya sile momeya. Ota ku hokololwa kutya mowato omwa li oondjatha mbali ishewe dhokwiihupitha ndele molwaashoka ombatu oya kandoma aaniilonga inaya vula oku dhi longitha.
Omidhimba ndatu odha li dha monika sigo okomatango gosoondaha, ndhika odha Kloppers na Stephen Haukongo ndhoka dha umbwamo kefuta ongulohi yetine omanga ngoka gwa Shavuka Andreas ogwa zimo mefuta komatango gosoondaha.Yo owato yoyene ta yi undulwamo momeya ongula yetitano lyayi.
Pahapu dhomuwiliki gwehangano lyegameno lyokomunkulofuta, lyedhina West Coast Safety Initiative, Aubrey Goosen, ohashi kwata ominute dhili 21 opo omuntu a se kuutalala momeya gefuta lyAtilanda unene molwombepo ya Benguela.
Konima yekandomo lyombautu ndjoka iilonga yopaulumompumbwe ayihe poShiwakopo oya tondokele kehala hoka oku kakwathela.

---