Omuwiliki gwa Petrotek a thigipo ehangano omolwa omikuli

OSHILYO shewilikongundu lyehangano hali gandja omahooli lyo ishewe oha li kongo omahooli lyedhina Petrotek okwa thigipo uukwashilyo wewilikongundu lyalyo.

Clive Kavendjii okwa thigipo uukwashilyo mewilikongundu omolwa ekundaneko lyaashi ewanawa, unene kombinga aniwa yomukuli ngoka a pewa okuza kehangano ndyoka. Kavendjii okwa thigipo ewilikongundu ndyoka momasiku 24 gomwedhi nguka eshi ningi moku nyolela ombapila komuwiliki omukuluntu gwehangano, Isaiah Kavendjii, ngoka taku tiwa okwa li a kuthwa miilonga okathimbo momasiku 18 gomwedhi tuu nguka.Sho a pulwa kutya omolwashike inaa gandja ombapila yetseiyitho lyoku thiga po iilonga komunashipundi shewilikongundu, Tarah Shaanika, Kavendji okwa ti , kuye , Isaiah Kavendjii oye natango omuwilikipitithi gwehangano ndyoka. Okwa ti ishewe iihokolola kombinga yuuniipambuliko muPetrotek oyi li natango komeho gOmpangu yOpombanda.
Omushangwa gwokweethapo uukwashilyo mewilikongundu ina yi thika natango aniwa mombelewa yomunashipundi, Tarah Shaanika ngoka a ti  ka li  a uva oshinima shoka.A ti sigo osoondaha sho a pulwa oshinima shika oku shishi kutya Kavendjii oku li natango  omunashipambuliko ye ishewe oshilyo shewilikongundu.Isaiah Kavendjii okwa li a tulwa pevi momasiku 18 Juli, ndele etulwopevi lye ota li simononwa kiilyo yilwe yewilikongundu ndyoka, mbyoka yi wete Shaanika ngoka a shaina etulopevi lye keeli paveta ongo omunashipundi shewiliko ngundu, Shaanika otaku tiwa oye a landula Tobie Aupindi muunashipundi wa Petrotek.
Clive Kavendjii oku uvite uudhigu moshinima shokutya okwa pewa omukuli gwoodola omayovi 25 000, a ti iimaliwa mbyoka oyo oshitopolwa shofuto omolwa mayele ngoka a li a pe ehangano kombinga yeindilo lyalyo oku gandja omahooli kiiyenditho yepangelo okupitila muuministeli wiiyenditho niilonga.
Ehangano ndika olya li lya ndopa oku pewa otendela ndjoka. Omolwa iilonga yegandjo lyomayele gopaveta, Kavendjii aniwa okwa li ta pula Petrotek oodola omayovi 34 500, ndele aniwa Petrotek okwa tindi okufuta omwaalu ngoka gwa hupako, molwaashoka aniwa oshinima shika osha li tashi vulika okweetela Petrotek uupyakadhi wo ku kala ta futu iilyo mukehe okalonga hoka ya ningile ehangano.
Kavendji okwa lombwele oThe Namibian kutya ye kena esiku a indilile omukuli oku za ku Isaiah Kavendjii nenge ku Kriaat Kamanya, a ti ka li eshiwo nokutya opena omikuli tadhi pewa iilyo yewilikongundu lyehangano. Opwa li pena okwa uvathana kutya iimaliwa mbyoka ya pewa iilyo yewilikongundu oyo  omikuli nenge oombyoka ya gandjelwe omolwa iilonga mbyoka yo ya ningile ehangano.
Iilyo yilwe yewilikongundu kaya li aniwa ya kumithwa kezo miilonga lya Kavendjii, ndele oya hogolola oku mwena itaa ya hokolola sha.Omunashipambuliko gumwe okwa ti oshinima shoka oya kala omunambelewa ngoka okwa li etwa mehangano oku gandja omayakulo ndele okwa ka hulila a ningwa oshilyo shewilikongundu lyehangano.

---