Ombesa ya Andreas Angula ya pyapo

By: OSWALD SHIVUTE METOSHA

OMBESA ya Andreas Angula gwomomukunda Oshipanda mUukwambi moshitopolwa sha Musati yedhina Omuzile Express-Geneva, oya pi po thiluthilu mOsoondaha ya zi ko, ya pile mEtosha, mwene gwawo, Angula naahingi ye Fillemon Akawa na Paulus Mumbala taya lombwele The Namibian ngawo.

Akawa na Mumbala otaya ti kutya pehulilo lyoshiwike sha zi ko oya indilwa ku mwene gwuumbesa wa Katsa-Katsa  ye mu kwathele okufala aanasikola naalongi yokosikola yimwe yokOkongo kOukwanyama koshitopolwa sha Hangwena kEtosha ya ka tale nkene Etosha li li. Taya ti oya yi nombili nokutala ashihe mehuliloshiwike moka. mOsoondaha nee sho ya adhika taya galuka, manga ku na ashike ookilometa ntano lwaampoka ya thike pomweelo gwa Nehale mEtosha moka, oya kankamekwa komunambelewa gwegameno lyiiyamakuti  yomEtosha moka.
Ta ti aniwa kutya otaya hingilile, omanga mEtosha kamu hingililwa. Aahingi mbaka yaali, aniwa ta ye mu lombwele kutya otaya hingilile ngaa kashona ye kiihakane komweelo, molwashoka oya tila omulilo ngoka ye wete mooha dhawo. Okuza mpoka aniwa omunambelewa ngoka, okwa ti ote ya kala komeho yo taya hingi ye mu landula. Osho ya ningi, ashike nee, taya ti Omunambelewa okwa kala ta hingi kashona go omulilo ogwe ya nee kumwe nolwithi lwago.
Akawa ngoka a adhika ta hingi, ota ti kutya manga taya ende ya thinda komweelo ngawo, omulilo ogwe ya popepi nolwithi oluudha okambesa moka mwa li aalongwa ye li 22 , aalongi yaali noshowo nee yo yaali aahingi yokambesa hoka.
Olwithi sho lwiihanene nokambesa akehe, Akawa ota ti okwa kala ke wete ko we nondjila ke yi wete we. Ta pugama mo mondjila nokwa dhama.
 Pethimbo ndyoka omulilo ogwe ya nee gwa thinda kokambesa. Aanona naalongi kumwe nayo aahingi, oya nuka mo mokambesa moka nokufadhuka po ya thinda komunambelewa ngoka nokokambesa ka Katsa-Katsa. Omulilo ogwa kwata okambesa kawo nokatameka taka pipo.
Yo oya londekwa po ku Katsa Katsa nokmunambelewa ngoka nokufalwa komweelo gwa Nehale, hoka, konima ya kongelwa osheenditho shimwe nokuza ko, ya thiga okambesa ka, Angula ka pya po thiluthilu. Pethimbo oshinyolwa shika tashi yi komanyanyangidho inatu vula okwiimona naanambelewa aakuluntu mboka ye na sha negameno lyOkashana niiyamakuti yako ye tu pe okomenda yawo moshinima shika.

---