Ombaanga ya Barclays oyo ayike yina okulanda iipambuliko moCIH

OMBAANGA ya Namibia oya endulula kutya ombaanga ya Barclays PLC yo ko England oyo awike yina oku landa iipambuliko yooperesenda 49,9 mombaanga ya Venduka, ndele mbika ka yina oku landwa kombaanga ya Absa yoko South Africa.

Ekwashilipaleko ndika olya gandjwa sha landula sho oodokumente ndhoka dha shainwa koMinista Yiimaliwa, Saara Kuugongelwa-Amadhila ta mu holoka edhina lya Absa iikando oyindji. Ombaanga ya Absa oya li ya indile ombaanga ya Namibia mu May opo yi pewe eziminino lyoku landa iipambiliko yooperesenda 55,3 dhiipambuliko mehangano lya Capricorn Investments Holdings, nongele eindilo ndika olya ziminwa, shika otashi ka pa Absa ompito yoku kala ena iipambuliko yooperesenda49,9 mombaanga ya Venduka, ndjoka yili limwe lyomomahangano ga Capricorn Investments Holdings.
Absa okwa li a ningi onkambadhala ndjika ontiyali sha landula sho eindilo lye lya li lya tindwa omumvo 2010 moshinima osho tuu shoka.
 Ngashingeyi ombaanga ya Namibia oya gandja ezimino opo Barclays, goko UK, ngoka oye ena iipambuliko oyindji mo Absa a lande iipambuliko mombaanga ya Venduka. Minista Kuugongelwa-Amadhila okwa gandja omushangwa koKabinete momasiku 4 gomwedhi nguka a ulike kutya BoN okwa zimine kutya ABSA ota vulu okulanda iipambuliko mombaanga ya Venduka oku pitila mu Capricorn Investments Holdings. Momushangwa ngoka BoN okwa ulike kutya iipambuliko mbika na yi kale miikaha ya Barclays, ndele ha miikaha ya Absa gwa South Africa.
Shika osha ningwa oku yanda opo oombaanga adhihe dhomoshilongo dhi kale dhina ekwatathano lyopashimaliwa nomahupilo goshilongo shimwe ashike. Onkene iipambuliko mbyoka yomombaanga ya Venduka, nayi kale momake ga Barclays ngoka eli ombaanga yina oombelewa oonene moUK, ndele oha yi longele miitopolwa oyindji muuyuni. Ombaanga ndjika oya kala miilonga konyala uule womimvo omathele 300.
Omupopiliko gwaBoN, Ndangi Katoma  okwa ti etompelo kutya omolwashike Absa ta holoka olundji momishangwa ndhoka, omolwashoka eindilo lyiipambuliko olya li lya ningwa nokutumwa ku Absa.
Ndele nashi uviweko kutya eziminino oku landa iipambuliko mombaanga ya Venduka olya pewa ombaanga ya Barclays ndele haandjoka ya ABSA.
 Omuwiliki gwombaanga ya Venduka, Christo de Vries okwa ti uumwene wiipambuliko mo CIH owu li miikaha  ya Barclays ndele hamwaambyoka ya Absa Bank Limited.

---