Olodge ya edhile omiyelo naaniilonga ya kanitha iilonga yawo moKaras

KONYALA aaniilonga yeli 13 polodge ya Vogelstrausskluft popepi nomulonga gwa Fish River muumbugantu woshilongo oya kanitha iilonga yawo sho ehala ndyoka lyeedhilwa manga.Ehala ndika olya kala miilonga uule womimvo hamano dha pitipo.

Omuwiliki gwalyo, Jaco Kampfer okwa ti omahupilo ngoka itaaga ende nawa muuyuni ogo ga fala meshonopalo momwaalu gwaatalelipo kolodoge ndjoka.
Okwa ti ishewe eyonuko miikwamalusheno pehala mpoka olyo woo lya endeleleke epato lyayo. Na okwa tengeneke kutya otashi ka pula oodola omiliona yimwe opo omalusheno ngoka ga opalekwe. Aaniilonga pehala mpoka mboka oyendji ya za poKeetmanshoop oya shuninwe komagumbo . Ndele sho ya thiki moshilando shika  aaniilonga oya tindi  oku helulamo iinima yawo, ya ti  ina ya tseyithilwa kuyele kombinga yokukuthwa miilonga niishewe oya pumbwa okupewa ehulithopo lyiilonga yawo pambapila noshowo oya hala okuuva kutya iimaliwa yawo yokuza miilonga ota yi ka futwa uunake.
Oya ti onkundana kutya iilonga yawo oya hulapo oye yi tseyithilwa ashike  ohaluka. Oya indile Kampfer eya pe ekwashilipaleko kutya otaya ka futwa iimaliwa yawo yoku za miilonga naashika nashi kale sha kolekwa komeho gombelewa yaaniilonga yopoKaiti. Ndele Kampfer okwa tindi oku shi ninga a ti ye na ye okuli ashike omuniilonga , onkene ita vulu okutya sha kombinga yoofuto dhawo. Okwa ti aaniipambuliko yalyo  oyo ayeke taya vulu oku kwashilipaleka oofuto dhaaniilonga.
Kampfer okwa zimine kutya aaniilonga oya tseyithilwa kwa tokelwa kombinga yeedhilo lyolodge ndele okwe ya uvanekele kutya otaya ka futwa oondjambi dhawo dhomwedhi nguka opamwe niimaliwa yawo yoku kuthwa miilonga.Ndele ina vula okuulika kutya uunake iimaliwa yokuza miilonga ta yi ka futwa.Momushangwa gwopa email gwa nyolwa momasiku 24 Juli nuumvo omunashipambuliko gumwe gwehala ndyoka , Norbert Schulze okwa tseyithile aayenda, noshowo omahewa omakwawo mongeshefa kutya iilonga polodge ota yi ka edhila mbala, omolwa eyonuko miikwamalusheno.Okwa ti omolwashike olodge ita yi  ka vula okuyakula nando ongundu yimwe yaa yenda , oshoka oondunda itadhi vulu okupupyalekwa, ishewe omeya omapyu itaga longo noolamba itadhi tema. Iilonga yokwoopaleka iikwamalusheno mbika ota yi kwata ethimbo lyoomwedhi ne sigo oomwedhi ntano lwaampoka opo ngoka ga kale ishewe taga longo.

---