Conradie oku li moka kommittee komahangano gepangelo ngiini?

AAKWASHIGONGI poshigongi shokakommittee komahangano gepangelo oya li ya kumwa sho Dirk Conradie aniwa edhina lye lili momusholondondo gwiilyo ihamano yokangundu hoka taka wilike edhiladhilo lyokutulapo olupale lwoku topolelathana uunongo miinima ya guma omahangano gepangelo nenge ngoka haga takumwa SOE.

Okangundu haka okashona okathikamapo maanashipundi yomawilikongundu goSOE. Ndele Conradie okwaadhika a kuthwa muunashipundi wewiliko lya MTC omolwa efekelo lyoombumbo. Ota ku tiwa Conradie okwa ti oku li oshilyo shokakommittee hoka ongo handimwe ndele ina kalelapo MTC ongo omunashipundu shewilikongundu ndyoka.
Conradie na Sarah Damases oya li ya kwatwa kopolisi ta ya fekelwa oshinima shuulingilingi moshinima shotendela yoomiliona 60 ndjoka Conradie aniwa a uvanekele kutya ote ke yi pa ehangano ngele olya kutu Damases ongo omukalo gwokumunkondopeka. Conradie okwa li a tulwa pevi ongo omunashipundi shewilikongundu lya MTC, ndele MTC okwa tokola oku mu kaleka ta futwa iimaliwa ongo oshilyo shewilikongundu nando ye ita kuutumba we manga miigongi yewilikongundu, sho iindikwa kaa ye mekwatathano niilyo yewilikongundu ndyoka.
Conradie okwa ti oye eetapo edhiladhilo lyolupale lwo SOE onkene okwiiyamba yemwene oku ninga oshilyo sha gwedhwapo shokangundu longekidhi komulandu nomautho golupale nenge gomutumba ngoka.Iilyo yilwe mokakommittee oyo, Jerry Mwandinohamba [omunashipundi gwa Namport], Elize Angula[ Development Bank of Namibia], Abraham Nehemia[NamWater], Mandela Kapere[ National Youth Council] Maria Dax[NamibRe] na Andre September [Namibia Institue of Pathology.Onzo ndjoka ya li poshigongi oya ti kape shiwike kutya Conradie okwa tulwa mokakomittee ongo oshike na okwiiyamba ongo a kalelapo lye.
Oyendji oya li ya kumwa kutya oku li natango mewilikongundu lya MTC nonkumwe yawo oya nenepala sho a ningwa oshilyo shokangundulongekidhi komutumba gwoSOE.Oshigongi shotango shomutumba nguka osha longekidhilwe koshiketha sho MVAF. Mwandinohamba ngoka eli oshilyo shokakommittee hoka okwa ti woo ke shi wo kutya Conradie oku li muko ongo omukwashike.
Konima sho Mwandinohamba a kongo omayele kooyakwawo okwa yamukula kutya Conradie aniwa okwiiyamba oku longa mokakomittee hoka. Moshigongi omwa li mwa kala omahangano go SOE geli 32.

---