Aanona yomekondjelomanguluko ya lundile aawiliki yo Swapo

AANONA mboka ya valelwa mekondjelomanguluko , ya kuthilwe poombelewa oonene dhoSwapo moKatutura sha Venduka omaandaha oya lundile amushangandjayi gwongundu ndjoka, Pendukeni Iivula Ithana omolwa oshinima shoka.

Ongundu yaanona mbaka oya li ya fala enyenyeto lyawo komuwilikipitithi gwaNamRights, Phil ya Nangoloh ya ti aniwa Iivula-Ithana oye a gandja elombwelo kutya mbaka naya kuthwepo poombelewa mpoka.
Oya ti omuperesidende Hifikepunye Pohamba ha ye a gandja elombwelo ndyoka ngaashi sha popilwe kopolisi. Omutonateli omukuluntu, Hofni Kandjimi okwa lombwelele o The Namibian omaandaha kutya elombwelo opo aanona mboka ya kuthwepo olya zi komuperesidende, Hifikepunye Pohamba. Aanona oya ti ota ya gandja ombedhi ku Iivula-Ithana oshoka mesiku lyotango sho ya li ya talelepo oombelewa dhopaati, oya li aniwa ya dhengwa kopolisi, miipathi ye manga ye a li ta piti oku za moombelewa ndhoka,no ina yelutha nando omunwe a tye sha kwaashoka opolisi ya li ta yi ningi. Oya ti ishewe omaandaha sho aanona mboka ya dhengwa , yuundulugulwa noku kookololwa komiyadhashinana opo ya ze po poombelewa mpoka Iivula-Ithana oye aniwa gwa hugunina a thigipo oombelewa ndhoka no inaa tya nando osha kwaashoka sha ningilwa aanona mboka. Oya ti oye shishi kutya oye aniwa a gandja elombwelo opo yo ya monithwe iihuna ngaaka.
Oya ti oye shishi kutya keshi Omuperesidende oye a ti , ndele o Iivula-Ithana, osho, Shekupe Mutilifa gumwe gwaanona mboka a ti.Ya Nangolo okwa zimine pamwe nayo a ti Iivula-Ithana ongo ominista yUuyuki oku na oku kala a kwatela oshinima shika komeho.Ya Nangolo okwa tsikile noku gandja ombedhi komuperesidende, a ti omutse gwoshilongo ita gu vulu oku pitika shika, shi tsikile nokweetha aapolisi  ya dhenge aanona mbaka.
Okwa ti mbaka oyena eindilo li shi ku pulakenwa, pakotampango lyoshilongo. Ishewe yo mboka oyena uuthemba oku pula iilonga mbyoka yena oku pewa, onkene epangelo olina oku ya pulakena.Pethimbo aanona mbaka ya fala uupyakadhi wawo kuPhil ya Nangolo, Iivula-Ithana noshowo omuprima Minista otaku hokololwa kaaya li mo moshilando nenge kaa ya li taya vulu oku kwatathanwa nayo. Aanona mbaka oya li ya katuka okuza posasiona yomahooli ya Monte Christo, moKatutura noku ya koombelewa dha Namrights moVenduka yokuuninginino.
Oya yi hoka ya ka pule aniwa ekwatho ku Ya Nangolo nkene taya ningi oku futitha opolisi molwa emonitho lyiihuna. Ongundu yaagundjuka mbaka oya ti yo oye li natango iilyo yoSwapo, ya ti uupyakadhi mboka ye na oomboka woku pewa omayamukulo komapulo gawo shina sha niilonga. Oya ti yo oya hala epangelo li ya pulakene, unene tuu moshinima aniwa shomadhina gawo ga li momusholondondo  gwokupewa iilonga ndele aniwa ngoka oga ka kuthwa mo eta mu tulwa aniwa yalwe mboka yeshiwike kaakwanepangelo, pahapu dha John Amadhila gumwe gwomaanona yomekondjo.Ya Nangolo okwa pangula nayi elongitho lyoonkondo na okwa indile aanona mboka noshowo opolisi opo ya yande elongitho lyomatha, nopeha lyayo ya kundathane nkene oshikumungu shawo ta ye shi kandulapo pambili.Ya Nangolo okwa ti okwa indila opo a tsakanene nominista yOonakulwa aakulu, Nickey Iyambo noshowo nominista yaagundjuka, Kazenambo Kazenambo  oku tala oshinima shaanona mboka.Ehangano lyaanona ya Namibia ya valelwa muundjendi, Neka na lyo olya ti ota li kundathana naanona mboka noshowo nepangelo okumona epotokonono lyomukundu lili hwepo.Neka okwa pangula elongitho lyomatha  lyuukithwa mwaambaka. Okwa tsikile a ti okuuvite pamwe nayo, na ota kundathana nomalutu ga yooloka opo ngaka ga kwathele oku ya monena eyamukulo lili hwepo. Oye na woo oshigongi naMinista Kazenambo Kazenambo oshiwike tashiya oku kundathana kutya mbaka ota ya ningwa ngiini.
Aanona mbaka oya li ya pewa epitikilo komuwiliki gwa NamRights opo ya kale manga okathimbo poombelewa dhe.

---