Aaniilonga po LLD ya tuminwa komagumbo sho pwaana we iilonga yokupusha okawe

AANIILONGA konyala 150 yehangano lya Lev Leviev Diamonds[LLD] oya tuminwa komagumbno konima sho omupepo gwawo nenge ofabulika yawo yeedhile molwaashoka kapena okawe hoka taya hongo noku ka pusha.

Omuwiliki omukuluntu gwa LLD,Kombadayedu Kapwanga okwa ti natango ehangano lye olili moonkundathana nehangano elandithi lyokawe lya Namibia[Namibia Diamond Trading Company,[NDTC], ndele sigo oompaka ina pu adhika nando etsokumwe lya sha. Etitano oshiwike shayi, Jonas Lumbu amushanga gwehangano lyaaniilonga yomoomina lya Namibia[MUN] okwa ti LLD okwa zimine okufuta ondjambi yaaniilonga mbaka sigo omomasiku 20 gomwedhi nguka.
Kakele kaashika, aaniilonga ota ya ka futwa iimaliwa yokuza miilonga ya yalulwa ondjambi yoshiwike shimwe molwa omumvo kehe omuniilonga a longela , LLD. Ngele LLD okwa tameke ishewe iilonga yokuhonga nokupusha okawe, nena aaniilonga mbaka 150 oyo yena oku talwe tango moku pewa iilonga. Kapwanga oshiwike shika okwa ti, omuwiliki gwa LLD, Lev Leviev na ye oku na omaipulo kombinga yokweedhila kwomupepo nguka, Unene tuu oku shi talela medheulo ndyoka lya ningilwa aaniilonga mbaka ndele ngashingeyi oya tuminwa mostraata, oshinima tashi ehameke nokuuvitha nayi.Omwedhi gwa yi aaniilonga ya LLD oya li ya ehamekwa sho ya lombwelwa kutya ota ya tuminwa komagumbo pwaana ofuto uule wethimbo lyaashiwike.
 Oshinima shika  osha ningwa konima sho LLD inaa pewa ompito yokulanda uuwe okuza ku NDTC. Omahangano ashike geli 13 ogo haga pewa uuthemba wokulanda okawe okuza ku NDTC gwa Namibia omumvo kehe, na LLD ine shi pondola oku kala mokati komahangano ngoka geli 13 opo a vule oku landa okawe noku ka honga.Opo ehangano li pewe uuthemba woku landa uuwe okuza ku NDTC, oli na oku kala ha li vulu oku landitha uuwe wongushu yooU$10 oomiliona muuyuni auhe omumvo 2010, kakele koshipumbiwa shika ehangano  kehe oli na okwiiyutha komukalo gwokulonga nawa gwatulwapo ku De Beers ngoka  ena ooperesenda 50 dhiipambuliko  moNDTC. Kapwanga okwa tile ondjele yiiyemo yawo komumvo moodola dhAmerica oyo oomiliona omilongo mbali.
Ndele ehangano ndika olya li lya talelwa mehokolo lyaali nawa konima sho opolisi ya li ya kuthapo  uuwe konyala wuli omayovi 2 000 pofabulika ndjoka omumvogu. Shika kashi shiwike ngele osho sheetitha NDTC a tokole kaa gandje olisensa ompe ku LLD. Epeko lina sha noshinima shuuwe mboka olya tuminwa kombelewa yomutamaneki ndjayi opo a ninge etokolo ngele opena mboka yena oku tamanekwa molwa oshinima shoka.
Omutamaneki ndjayi sho a pulwa kombinga yaashika okwa ti okwa pula opolisi opo yi ninge ishewe omakonakono ga gwedhwapo omanga ye ina tokola kutya oshike shi na okuningwa po mwaashika.Pethimbo uuwe mboka wa li wa kuthwa pofabulika ndjika kopolisi, LLD  okwa li a lundile omuniilonga gwe omuIsraeli, Gabi Shitrit kutya oye a li ta kambadhala oku ya ka po uuwe mboka.

---