Aakalimo ya Shomeya yena oongunga dha muni oomiliona 77

AAKALIMO ya Shomeya oyena oongunga na muni gwawo dhoomiliona 77 sigo oompaka.

Omuwiliki gwiiniwe mewiliko lya Shomeya, Karolina Damaseb okwa ti omwaalu nguka ogwa kala nokwiindjipala omwedhi kehe.Ndele ina vula okugandja omwaalu ngoka aakalimo inaa ya futa muni gwawo sigo oompaka.
Okwa ti omiyalu ndhoka inadhi yalulwa nokutulwa kumwe natango. Okwa ti ewiliko lye ota li longo lya manamo okukondolola oongunga ndhoka, ndele ina li pitikwa oku tidha aakalimo momagumbo gawo molwaashoka yo yena oonginga.Okwa ti etompelo enene lyokwaafuta omayakulo gopamuni omolwashoka mbaka ka yena iilonga.Okwa ti nonando oya teteko omeya kaakalimo mboka yena oongunga, olundji oongunga dhawo otadhi tsikile, oshoka muni oheya tumine omayalulo genasha nomayakulo  nekuthepo lyiiyagaya, iifendela noshowo ofuto yomaliko, naambika woo aakalimo oha ya nyengwa oku yi futa. Damaseb okwa ti ewiliko lyOshomeya ota li tulamo oopomba ndhoka dhomeya gafutilwa nale okukeelela aakwashigwana  yaa gwile moongunga.
Okwa ti oya gandja woo ethaneko kOshikondo shOmalelo giitopolwa nIilando opo oongunga dhaakulupe dhi dhimwepo, oshoka oyi itaala kutya shika otashi ke ya kumika opo ya fute iimaliwa yomayakulo gawo ngoka ge li monima.
Damaseb okwa ti ewiliko lyoshilando she kali na oongunga naagandji yolusheno NamPower na NamWater. Meya gwa Shomeya Ndangi Sheetekela okwa ti muni ota kambadhala noonkondo adhihe opo ya monemo iimaliwa mbyoka inaa yi futwa kaakalimo.Okwa ti oha ya landitha omayakulo kaakalimo pangeshefa, ishewe oongunga ndhoka inadhi ningwa ashike mbalambala ndele odha gongala uule womimvo odhindji.
Ewiliko lya Shomeya olya li lya pewa uusama konima sho lya landa osheenditho oshipe shoku  longithwa ku meya.

---