Aafekelwa yiikala elundilo lyokuyuga oodola oomiliona 2,2

AAFEKELWA yaali yomwaamboka taya lundilwa aniwa kutya oya li oshitopolwa sheyugo lyoomiliona 2,2 dhomunangeshefa omukwiilongo moKlein Windhoek oya ti yo kayena owino washa kombinga yoshinima shoka.

Michael Shidiwe[53] na Eliaser Amukoto[50] oyi ikala omalundilo ngoka ya ningilwa pethimbo yali ya indile opo yiifutilemo mokakuma kopolisi, komeho ga mengestrata, Ingrid Unengu.Pahapu dhawo yo oya ti yo aalumentu yenasha painiwe. Amukoto okwa lombwele ohofa kutya okuna egumbo moEros sha Venduka lyongushu yoodola oomiliona 3,2 nokuna ishewe omagumbo gatatu gena ongushu ayihe kumwe yoodola omiliona 1,3 moshilandopangelo.
Okwa tengeneke kutya omahala ngoka inaaga tungwasha ena moVenduka nomOkahao ogena ongushu yoodola oomiliona 2,4, omanga iiyenditho mbyoka ena yili ine mbyoka ya kwatelamo iyali yoludhi lwo Mercedes Benzes oyina ongushu yoodola omiliona 1,1. Amukoto okwa lombwele ohofa kutya osikola okwe yi hulithile mongundu ontine yopethimbo lye omumvo 1976. Petameko lyomimvo 1980 okwa longo moVenduka uule womimvo ntano ha longo noohamburgers, nokonima okwa ka tembukila kOngwediva hoka a kala ha hingi ololi yokututa iiyagaya ya yinakulu sigo omo1990.
Okwa ka mona oshimaliwa okuza momashina gokudhana iimaliwa ngoka ye a li a landa. Ngashingeyi oku li omunangeshefa momatungo, mokupangela ominino dhomeya, ha longo niikwamalusheno, yo iilonga mbika oha yi mweetele oodola omayovi 70 000 komwedhi. Nando ongawo, Amukoto okwa ti ota vulu ashike okufuta oodola 10 000 molwaashoka oyindji yomiiyemo mbyoka a popi oha yi longithwa okufuta shoka ha longitha. Shidiwe kombinga ye okwa ti okuna egumbo moWanaheda moVenduka lyongushu yoodola omayovi 800 000, na okuna ishewe omahala mpoka tapa vulu okutungwa gena ongushu yoodola omiliona yimwe, mOkahandja, no Henties Bay. Oku na woo iiyenditho itatu, iyali yomuyo yoludhi lwo Mercedes Benzes, mbika oyina ongushu yoodola omiliona yimwe noshinkwanu hamano.Shidiwe okwa ti okuna woo oongombe tadhi tengenekwa dhina ongushu yoodola omayovi 300 000. Aalumentu mbaka pamwe nookonstable  dhopolisi, Nestor Kashuupulwa[34] na Mupopwa Mupopiwa[32] otaya indile opo yiikulilemo mondjedhililo omanga taya tamanekelwa eyugo, nokwiiningitha ya fa aapolisi.Omutamanekwa gwotango Josia Zorro Muhongo [54] okwa pewa nale iifutilemo oodola omayovi 30 000 oshiwike shika.
Eindilo lyeifutilemo lya Shidiwe, Amukoto naanambelewa yopolisi , olya pulakenwa ku mengestrata, Ingrid Unengu , konima sho mengestrata. Gibson Imbili iikuthamo miihokolola mbyoka, molwaashoka aniwa okwa lundilwa kutya okuna ekwatathano lyopazimo na Muhongo , ye ishewe okwa li aniwa halongele kumwe na Shidiwe pangeshefa mona ku ziwa.Aatamanekwa mbaka yatano ota ya lundilwa ya li moshinima sheyugo lyiimaliwa yoodola oomiliona konyala 2,2, yedhi yugu aniwa omunangeshefa omuLebanese, mo Klein Windhoek. Oshinima shoka aniwa osha ningwa sho  omunangeshefa ngoka Vicken Kaprelian na Muhongo ya li ya tsakanene paandja  Shidiwe  kombinga yompito oku landa olisensa yokukonga omahooli. Okwa hokololwa kutya manga yeli mpoka aalumentu yatatu aniwa oya ponokele megumbo yati yo aniwa aapolisi  ye ya oku konakona iilonga yuumbudhi.
 Gumwe gwomwaambaka  ya ti aapolisi okwa kuthapo ompunda ndjoka ya li niimaliwa mbyoka taku tiwa oye ya po na Kaprelian. Mehokololo lye komeho gohofa, Shidiwe okwa ti ye ina yuga omuntu, ishewe iniifetha ongo omunambelewa gwopolisi, na ishewe ina kutha nando oshimaliwa komuntu gwontumba esiku ndyoka eti 16 lya May. Okwa ti ye kena ondjo, nokwa endulula  eikalo lye ndyoka kutya kena ondjo, noku tinda oku gandja omayamukulo komapulo ngoka taga yi muule. Amukoto ngoka a li a kwatwa oshiwike sha yi okwa lombwele mengestrata kutya okwa kumwa nokwa haluka okuuva kutya  ye ota lundilwa a kuthombinga meyugo ndyoka.Okwa ti monkalamwenyo ye kena esiku a li oshitopolwa she yugo. Okwa ti kena shoka eshi kombinga yomasiku 16 May. Ohofa oya uvu woo kutya Amukoto okwa li a ulikwamo mokati kaantu mboka ya li taya fekelelwa oshinima shika, konima sho a li a kwatwa. Iihokolola yefutilemo yaambaka olya li lya tsikilwa metine oshiwike shika.

---