A pewa omagano gohauto yo 4 x4

OMUKWANIILWA gwAakwangali, Sitentu Mpasi okwa zimine mohofa kutya okwa pelwe epandulo molupe lwosheenditho sho Land Cruiser hashi nana komagulu agehe omolwa evi ndyoka apele gavena gwoshitopolwa sha Hangwena omimvo dha piti.

Omukwaniilwa Mpasi okwa koleke oshinima shika mohofa ya mengestrata poKahenge moshitopolwa sha Kavango pethimbo lyiihokolola mbyoka a ningile aasitangombe 30, molwa okulitha oongombe dhawo shaali paveta moshitopolwa shi li kohi yewiliko lye. Mpasi okwa li a ningile aasitangombe omilongo 30 oshipotha shoku litha yaana epitikilo moshitopolwa she. Oyendji yomaaniimuna mbaka oya za miitopolwa Oshikoto nOhangwena. Oshipotha shika osha li sha pulakenwa  okuza Omaandaha sigo Etitano oshiwike sha yi.
Omukwaniilwa Mpasi sho a pulapulwa, kohahende yaaniimuna, Norman Tjombe, okwa yamukula a ti okwa li a pewa osheenditho sho LandCruiser  ha yi nana akuhe  sho a li a pe Ngoloneya gwaHangwena iipambu iyali yevi moshitopolwa shUukwangali.Omukwaniilwa nguka okwa li a tindi petameko lyiihokolola kutya okwa gandjele evi lyaayehe moshitopolwa she kaaniimuna aapopi yOshiwambo, ndele sho a pulwa uule womasiku gatatu mohofa okwa zimimne kutya okwa gandja omahala koohashike shalye mopolitika.
Mokati kaamboka ya li ya pewa omahala  omuna Nghaamwa, Erkki Nghimtina ominista Yiilonga nIiyenditho, omukuluntu nale gwomatanga gegameno, nakusa Dimo Hamaambo, omukalelipo shilongo sha Namibia ko Russia, Ndali Kamati noshowo oshilyo nale sho Swapo nongashingeyi oshilyo sho Rally for Democracy and Progress[RDP], Shapwa Kaukungwa. Konima sho a pulwa kutya okwa hogolola ashike oku tidha aanangombe oohepele okuyeleka naamboka yena omakwatathano omawanawa gopapolitika, Mpasi okwa koleke kutya okwa li a pewa o Land Cruiser ongo omagano ku gavena Nghaamwa. Konima yoku zimina oshinima shika, mengestrata okwa londodha Omukwaniilwa Mpasi opo a tinde oku yamukula omapulo ngoka tashi vulika ge mu monikithe ondjo.
Ngoloneya gwa Hangwena, Nghaamwa sho a pulwa kombinga yoku gandja osheenditho shoka, okwa ti  natango okwa tsikila oku gandja , ngele oku nasha okugandja. Naashoka a pele omuleli gUukwangali osho ashike omagano ndele kashishi ofuto. Okwa tsikile a ti oha gandja oshindji kaakwaniilwa, kaanyekadhi, komanongelo, komihandjo,nokoondohotola dhospeciala.
A ti shika ohe shi ningi niimaliwa yemwene, na okwa ti ota tsikile nokugandja noshowo oku yambidhidha. Omukwaniilwa Mpasi okwa lundilile aaniimuma yokomahala gaayehe yeli omilongo 30 yokiitopolwa Oshikoto nOhangwena sho aniwa ya li haya litha iimuna yawo moshitopolwa she pwaana epitikilo okuza kelelo lye. Maaniimuna mbaka omwa li omuselekadhi Emilia Nghilundilwa naye kwali  taku tiwa okwa li ta litha moka shaali paveta nonando nakusa omulume oye omuKwangali. Onkene omutamaneki ndjayi, okwa ethapo oshipotha shoka sha ningilwa Nghilundilwa, molwaashoka nakusa omusamane gwe okwa li omulelwa kohi yewiliko lyUukwangali onkene oku na uuthemba oku litha iimuna ye mehala lyaayehe ndyoka.Mpasi okwa li a pulwa mohofa ngele okwa li ta tidha Nghilundilwa molwaashoka , nguka okwe mu tindi.
Mpasi okwa ekelehi elundilo ndyoka.Omutamaneki ndjayi Martha Imalwa okwa utha woo kutya aatamanekwa yalwe yahamano nayo ina ya hokololithwa oshoka mboka iilyo yoludhi lwAakwangali. Iihokolola yaanafaalama mbaka ota yi ka pulakenwa ishewe momasiku 28 ga Auguste nuumvo.

---