RDP ota ka holola omadhiladhilo oshilongo ashihe molwetokolo

ONGUNDU yo Rally for Democracy and Progress[RDP] oya shunitha iilyo yayo kiitopolwa yawo oshiwike sha yi nelombwelo kutya mbika na yi kiilongekidhile ehololo lyomadhiladhilo oshilongo ashihe.

Elalakano olyo oku thiminika ohofa onene yoshilongo opo yi gandje  etokolo lyayo kombinga yoshinima shomahogololo gomumvo 2009. Omupopiliko gwa RDP, Nghiningilwandubo Kashume okwa ti elalakano olyo oku soshimpwiyu kutya iitopolwa ayihe oya ninga omahololo gomadhiladhilo poohofa dhoomengestrata olyomakaya kehe mpoka tashi vulika.
Kashume okwa ti ongundu ye otayi kala ya tseya pehulilo lyoshiwike shika ngele  iitopolwa ayihe oyiilongekidha, nongele ayihe oyiilongekidha nena ehololo lyomadhiladhilo ndyoka miitopolwa ota li ka ningwa okutameka olyomakaya ngaka.
Ongundu ndjika oya tamekele ehololo lyomadhiladhilo momasiku 15 ga July nuumvo.
Oyi itaala kutya aanpanguli mboka yatano oya adha etokolo lyawo ndele ohofa aniwa otayi nyengwa okuli gandja omolwa enwethemo lyopapolitika. Omupanguli omukuluntu, Peter Shivute meti 17 Juli okwa li a ekelehi omalundilo ngoka kutya opena enwethemo lyopapolitika nenge lilwe, na okwa gwedhako a ti oshoka ye ogumwe gwaamboka taya ningi etokolo moshinima shika ye ita ti we sha koshinima shika oku shi popya miipathi.Sigo oompaka kape shiwike kutya uunake ngiika etokolo ndyoka tali ka gandjwa.
Kashume okwa ti RDP oyi ilongekidha oku tseyithila ompangu onene yoshilongo okupitila muaamushanga gwayo Elsie Schickerling opo ndjika yi thiminikwe yi gandje etokolo lyayo.
Omulongi gwooveta poUnam, Nico Horn okwa ti itashi kwatha sha oku holola omadhiladhilo oshoka oongundu ndhoka dha fala oshipotha kohofa odha tegelela etokolo lyayo muulethimbo lishi kupulakenwa.
Oparliamende ndjoka ya hogololwa okupitila momahogololo ngoka taga kondjithwa mohofa oyi li miilonga uule womimvo ndatu ngashingeyi nomahogololo ga landulako  gopashigwana ga landulako oongoka gomomumvo 2014.
Horn okwa ti ngele etokolo olya kwata ethimbo inaali gandjwa nena ita pa kala we ompito opo pu adhike epotokonono lyomukundu moshinima shika omanga omahogololo omakwawo inaaga thika.
Okwa ti ngele oshipotha shika osha shunithwa koHofa yopombanda otashi ka kwata ishewe oomwedhi hamano sigo omvula yimwe omanga shika inaashi pulakenwa osho Horn ati

---