Pohamba iindilwa a holole iizemo yokakomisi puuyelele

OMUPERESIDENDE Hifikepunye Pohamba okwa indilwa opo a gandje iizemo yokomisi ndjoka tayi konakona onkalo yuundjolowele miipangelo yepangelo puuyelele, uuna mbika eyi pewa.

Ndika olyo eindilo lya ningwa kominista yOshikondo shUukalinawa, Richard Kamwi naandika olya ningwa woo komuwiliki gwa Swanu, Usutuaije Maamberua.Omuwiliki gwa Swanu okwa ti kakele ka Pohamba ta gandja iizemo mbika koshigwana, okwa pumbwa woo oku tulapo  okomitee ndjoka ta yi kala noku talela kutya omathaneko ngoka kwatiwa naga ningwe opo oshikondo shuukalinawa shihwepopekwe oga tulwa miilonga. Maamberua okwa pandula etokolo lya Pohamba okuulika oka komitee hoka ati ndika etokolo lyokwakola.Okwa ti ye okwa kala nokupopya eshunomonima monkalo yoshikondo shuukalinawa moparliamende  noshowo ku Pohamba poompito dha yooloka. Unene tuu kombinga yoku yakula aavu nayi noshowo uuyogoki miipangelo yoholomende ongo iinima mbyoka ya kala ya pumbwa oku talwa nawa. Maamberua okwa thaneke woo kutya osha pumbiwa putulwe ombudsman guundjolowele opo a kale ta longo nomanyenyeto genasha niinima yuundjolowele. Iinima  yilwe mbyoka  ye mu uvitha nayi, Maamberua okwa ti omaihumbato gaaniilonga yuundjolowele, eyonaguko lyomahala giipangelo niipumbiwa yuundjolowele, onkalo yomiti, noshowo ewiliko lyoshimaliwa moshikondo shoka.
Okwa ti shika otashi ti uuna pena omashongo agehe ngaka omayakulo ge li nawa itaga ka gandjwa nawa.Kamwi eindilo lye kutya iizemo yokomisi na yi gandjwe koshigwana okwe li ningi sho a li a pulwa ko NBC tiivii.Kamwi okwa ti ngashingeyi osha pummbiwa opo okomisi yi pewe ompito opo yi longe shoka ya ulikilwa yi longe.Okomisi oyina oshinakugwanithwa okutala ongushu yepango ndyoka ha li pewa aavu miipangelo, onkalo yuundjolowele waakiintu , uuhanona, aanona naagundjuka yopetameko. Okomisi ota yitala ishewe ongushu yelongo lyoondohotola naapangi, okuhololapo omusindalongo, uulethimbo welongo ndyoka ha li pewa  aaniilonga yuundjolowele.Iilyo yokomisi ndjika oyo omupanguli eli mopenzela, Simpson Mtambanengwe omunashipundi, omundohotola, Edward T Maganu amushanga nale moshikondo shuundjolowele, moBotswana , omundohotola, John Keiseb na Celine Usiku omuwiliki moonzo dhopantu.

---