Oondjindikila dha gumu aapitithi yiinima poongamba nayi

AAPITITHI yiinima pomiyelo dhuupitilo wopoongamba oyu uvitile nayi etokolo lyUuministeli wIimaliwa okwiindika omahangano ngoka ga longithe omatimwaaumbilitho nenge omakwashilipaleko kombinga yiinima mbyoka ngoka taga kwathele okupititha piiyelo mbyoka.

Ominista yOpevi yIimaliwa , Calle Schlettwein, okwa ti oondjindikila ndhoka dha tulwa miilonga momasiku 26 July osha ningwa oku gamena aafendeli.Okwa koleke kutya aapitithi yiilandomwa niinima yilwe poongamba okuya moshilongo nenge okupitilamo okuya kiilongo yilwe inaya indikwa yaa longe iilonga yawo, ishewe inaya indikwa okulongitha omauvaneko nenge omatimwaaumbilitho gayo yene uuna taya enditha iinima.
Okwa endulula kutya oku za momasiku 26 July, mboka inaa ya pitikwa ashike okulongitha omakwashilipaleko gaantu yalwe  ngoka opo ya endithe iinima yawo. Schlettwein okwa ti monakuziwa omanga oshinima shika inaa shi indikwa, aapithi yiinima oya li haya hehela omatimwaumbilitho gomahangano gamwe okupititha iinima unene mbyoka yuuka kiilongo yaana efuta ngaashi Botswana, Zambia na Zimbabwe.
Uuna pena uupyakadhi nomitsalo ndhoka tadhi endithwa kehangano ndyoka lya indila ekwatho kekwawo, nena epangelo otashi vulika li kane oshoka etimwaumbilitho ndyoka olya uvathanwa ashike pokati kehangano ndyoka lye li ninga nombaanga .Omupopiliko gUuministeli Wiimaliwa okwa ti oshinima shika kashi shiwike kutya osha tameke uunake ,ndele shoka sha simana ooshoka kutya shika kashili paveta.
Schlettwein okwa ti omukalo nguka ota gu kanithile epangelo iimaliwa miifuta yoompale, naambyoka ngele ina yi futwa nena mboka ye na oku futa eyooloko omolwa ekanitho ndyoka oyo aafendeli yomoshilongo.Etseyitho ndika olya taambwako neyeme noshowo nomanyenyeto kaanambelewa aashona mboka haya pititha iinima pomiyelo, ya ti yo kayena iimaliwa nenge omayambidhidho gopashimaliwa na ishewe yo ihaya vulu okumona etimwaumbilitho.Nampa okwa kundaneke kutya omahangano gokweenditha nokupititha iinima poongamba geli 76 omashona nogopokati ogo ga gumwa koshinima shika, ogendji gomugo geli komunkulofuta.Poongamba dha Shikango poHelao Nafidi muumbangalantu woshilongo omahangano 30 gena aaniilonga konyala 100 oga gumwa koshinima shika.
Regina Amupolo gwehangano lya Pride Clearing and Forwarding Agent okwa indile oshikondo shIimaliwa opo shi talulule oshinima shika molwaashoka oololi odhindji dhoondongelwa odha thikama poongamba pOshikango, pOmbaye nopiiyelo yilwe yopoongamba. Okwa ti aayakulwa yawo otaya nyenyeta sho taya kanitha okungeshefa molwa ethikamo lyethimbo ele sho iinima yawo inayi pitikwa yipite.
Amupolo okwa ti oongeshefa ooshona naandhoka dhopokati kadhina iimaliwa ya gwana okwiimonena etimwaumbilitho, oshoka opo ehangano li li mone olina oku kala lina oodola omiliona 1,6.Amupolo okwa ti oshinima nenge etokolo ndyoka oye li tala lya fa ongo epangelo lya hala oku kuthapo oompito dhawo dhiilonga.Omunambelewa gwopoongamba Festus Shidute okwa nyolele aanangeshefa mbaka kutya ohashi kala oshidhigu oku galulako iimaliwa mbyoka ya li yina okufutwa  kwaamboka uuna iinima mbyoka ya kwashilipalekwa inaa yi futilwa oompale dhopoongamba.Aapitithi mbaka yiinima piiyelo yopoongamba kayena iimaliwa ya gwana okwiimonena omatimwaaumbilitho gawo yene nopamukalo ngoka ota ya vulu oku pititha iinima yookustoma dhawo pwaana uupyakadhi washa.

---