Oombapila dhoku teta nokulanditha iipilangi

IILONGA yokuteta iiti unene tuu moshitopolwa sha Kavango oya thiminike oshikongo shiihwa muuministeli wUunamapya opo shi mweneke manga okugandja oombapila kaantu mboka ya hala oku teta omiti dhiipilangi okuza mesiku lyotango lyomwedhi nguka.

Oombapila dhoku teta omiti nenge okugongela ndhoka dha kukuta  odha mwenekwa manga uule wethimbo lyaashiwike.Amushanga omukuluntu moshikondo shoka, Joseph Iita okwa ti iiningwanima yomasiku ngaka oyo ya thiminike oshikondo she opo shi talulule omukalo ngoka sha li tashi longo nagwo okugandja uuthemba kaakongi yomiti oku dhi ninga iipilangi.Iita okwa ti oshikondo she otashi tala omalongekidho ngoka gelipo ngashingeyi opo shi tale ngele osha pumbiwa ngaka ga lundululwe oku kondjitha iilonga yaali paveta mbyoka ya lopotwa miikundaneki omasiku gaziko.
Iilonga mbika otayi eta omaipulo gaantu oyendji mwakwatelwa oshikondo she shoka osho shina oshinakugwanithwa oku kondolola elongitho lyoonzo ndhika dhopaushitwe.
Oshiwike sha pitipo elelo lyopahedhi lyaMbunza olya mono  omiti oondumba dha tetwa pwaana epitikilo moshitopolwa shili kohi yelelo lyasho. Omiti ndhika odha kwatelamo oopala omathele 600 niipilangi omilongo 90 , mbyoka ya kwatwapo pomikunda dhili po Mile 20 na Mile 30, Mbeyo noshowo Epingiro moshitopolwa hashi wilikwa kelelo lyaaMbunza.Omikunda ndhoka mwaadhika omiti ndhika otadhi adhika muumbugantu wo Rundu.
Omiti ndhoka odha li dha londekwa momaloli gatatu  ga li mondjila okuya koshitopolwa shaHangwena  kOshikango, ololi yimwe ya humbata iipilangi oya li woo ya monikwa. Iita okwa ti iilongomwa yomomakuti yaza kiilongo ngaashi Angola, Zimbabwe, na Zambia ota yi ka talika noku konakonwa woo nawa opo ku monike ngele ndhika odha za tuu shili kiilongo mbyoka.Aanambelewa yomakuti otaya kala noku talela  einyengo lyomiti okutala kutya ndhika odha za peni.
Engambeko lyokuteta omiti olya kwata omakuti agehe kutya ongo goshigwana nenge ngoka inaaga tumbulwa kutya ogoshigwana oshilongo ashihe. Oshikondo shika osha indile opo oshigwana shi gandje elongelokumwe lyasho.
Na ishewe mboka ya pewa ooperemeta dhokuteta omiti dha li dha gandjwa omanga oondjindikila ndhika inaadhi tulwa miilonga oya indilwa  opo ya ka konge uuyelele koombelewa dhomakuti miitopolwa yawo okuuva kutya oshike yena okuningapo.  

---