Oodokumende dha yakelwa iikundaneki

OKWAAIDHIDHIMIKA otaku koko mokati kiilyo yokabinete noshowo kaanambelewa aakuluntu megumbo lyepangelo konima sho omahokololo ga holoka miikundaneki ga kankamekelwa komishangwa dheinekelo dhepangelo.

O The Namibian oya kundana kutya iilyo yokabinete naanambelewa aakuluntu oyuuvite nayi omolwa  oodokumende dheinekelo nodhomeholamo  hadhi yakelwa aatoolinkundana dho tadhi gandja uuyelele kombinga yoonkundathana ndhoka inaadhi manithwa natango noshowo inaadhi pya okutseyithilwa oshigwana. Ominista Yiilonga nIiyenditho, Erkki Nghimtina ina idhidhimika sho a pulwa koThe Namibian oku komenda kombinga  yehangano lyuupale woondhila.
Pehala lyoku yamukula omapulo kombinga yehangano lyuupale woondhila , Nghimtina okwa pula a hala okuuva kutya olye onzo yodokumende ndjoka . Okwa tsikile a ti okwa lombwela opolisi opo yi kwate kehe gumwe ngoka ta ka monika a yakela omutoolinkundana omishangwa dhepangelo.Opena iinima iiholekwa muuyuni wetu na otwa hala oku kwata omuntu gwontumba.
Aanambelewa aakuluntu mokabinete noshowo pegumbo lyepangelo oya indile oThe Namibian opo yi hulithepo okushanga melandulathano  oodukumende dhomeholamo dhoKabinete. Oya gana kutya otaya ka longitha oonkondo noshowo ashihe shoka taya vulu opo ya mone ngoka ha ya kele iifo nkunda omauyelele ngoka.
Oye na omaipulo kutya iikundathanwa yimwe ohayi hololwa puuyelele omanga mbika inaayi manithwa nawanawa.Na ishewe omahokololo ngoka ka geli muuwanawa wehumokomeho lyoshigwana. Ehokololo limwe lya fa ndyoka oondyoka lyomathaneko gokudhikapo ethano dhimbulutho lyomukokoliperesidende Sam Nujoma komeho gomuseuma yemanguluko mepandaanda lya Robert Mugabe moVenduka. Oya ti oshinima shika osha li manga sha pumbiwa oku falwa koshigwana, ndele nee osha hololwa inaashi pya.
Oshiholelwa oshikwawo ooshoka shOmbaanga ya Namibia  ya pingenepo omutse gwa Hendrik Witbooi komafo goodola omilongo mbali noshowo oodola omulongo nomutse gwa Nujoma.
Kapwa li pwa ningwa oonkundathana kombinga yaashika, ndele ndhika odha ka ningwa konima sho iimaliwa ya nyanyangidhwa nale.

---