Omayovi gaheyali gaaniilonga momapandaanda

KONYALA ooperesenda 80 dhaaniilonga yopakathimbo mboka ya li haya longo okupitila momahangano goku hehelitha aantu oye li yaana iilonga okuza mu 1Auguste nuumvo.

Mbaka oye li yaana iilonga konima yetulo miilonga lyelundululo moveta yaaniilonga ndyoka lya indike opo omahangano ngoka gaa kute we aaniilonga pamukalo ngoka.Aaniilonga mboka ngashingeyi oye li monkalo yaana egameno kombinga yoku kala niilonga, okuyeleka nethimbo sho ya li ya kutwa okupitila momahangano go pa labour hire.
Oveta ndjika ota ku tiwa oya eta evundakano mokati komahangano ngoka ha ga longelwa kaantu mboka noshowo mokati komahangano ngoka ogo haga gandja aaniilonga mbaka.Oshinima shika ota ku kundanekwa kutya osha guma nokweehameka woo aaniilonga mboka oyo taya kondjelwa koveta ndjika.Aaniilonga mboka ya mono iilonga ta yi kalele oya nyanyukilwa oveta ndjika, ihe mbaka oye li ashike momwaalu omushona, omanga oyendji oyo ya kanitha iilonga yawo.Africa Personnel Services[APS] okwa ti konyala ooperesenda75 dhomahangano ngoka ga li haga longitha aaniilonga okuza kuyo  oya hulithapo omauvathano goku hehela aaniilonga mboka, naashika osha fala maaniilonga mbaka ya kuthwe miilonga.
Konyala aaniilonga ashike yeli 235 oyo ya mono iilonga yaaluhe nenge tayi kalele. APS okwa ti omupya omunene oongoka kutya aaniilonga yeli 800 oya kanitha iilonga yawo oshoka omahangano ngoka ga li hage ya indile okuza ku APS molwiilonga yopakathimbo itaga vulu aniwa oku ya kuta miilonga yethimbo alihe, pahapu yomuwiliki gwopashimaliwa, Robert de Villiers.
Omuwiliki gwa APS, Ranga Haikali okwa ti oshikondo shoku hehelitha aaniilonga  oshi na omwaalu gwaantu omayovi konyala 10 000, na otashi ka thiminikwa oku  kuta ashike aaniilonga aashona noku tumina 7 000 komagumbo.. Okwa ti ehangano lye olya taalela etekepo lyopaveta, ngele eindilo lyalyo opo etulo miilonga lyoveta ndjika li kalekwe ina li ziminwa.
Omahangano go Labour Hire ogo haga ende pokati haga shanga aaniilonga momambo gago, noku tumina mbaka komahangano galwe ngoka geya pumbwa uule wethimbo lyontumba. Oveta ompe oya kuthapo oshinima shika, na otayi thiminike omahangano opo ga kute aaniilonga mbyoka gogene, kokutya uuna omuniilonga  a kutwa nena ota kala nomauwanawa naanaa ngaashi ngoka ge niwe kaaniilonga taya kala aluhe yomehangano ndyoka.
Omahanganp gamwe oga ti go itaga vulu oku kuta aantu pethimbo ndyoka miilonga yaaluhe, molwaashoka go oge ya pumbwa ashike uule wethimbo lyontumba.
 Omahangano ngoka oga thaneke kutya oolabour hire andola inayi kuthwapo thiluthilu, ndele naga kondololwe. Ekanitho lyiilonga ndika enene olya adha naamboka taya popile oveta ompe yaaniilonga , ohaluka. Gumwe gwaamboka itaa ya popile oolabourhire ngaashi, Herbert Jauch ngoka a ti  omahangano oga pumbwa oku tala oompito nomikalo dha yooloka nkene taga longo naantu mbaka moku ya kongela oompito dhiilonga yaaluhe.Jauch okwa ti omahangano gamwe oga fa taga ningile owina oku tidha aaniilonga miilonga ongo omukalo gwo kuya hepeka omolwa oveta ndjoka ompe.Oveta ndjika ota yi utha kutya omuniilonga a hehelwa ngele okwa ka longa mehangano lyontumba nena ngoka okwa talikako ongo omuniilonga takalele mehangano ndyoka ena omauwanawa agehe naanaa ngaashi ngoka taga monika kaaniilonga yethimbo alihe mehangano ndyoka.  

---