Oku teta omiti kwa indikwa manga moshilelwa mbinga shaaMbunza

OMUWILIKI gwelelo lyopahedhi lyaaMbunza okwa mweneke manga eteto lyiiti moshitopolwa she uule wokathimbo.

Eindiko lyokuteta omiti ndika olya landula sho pwa li pwiitsuwa  ondumba yomiti ndhoka dha li dha tetwa pwaana epitikilo momudhingoloko ngoka.Omiti ndhoka odha kwatelamo iiti yili omathele gahamano niipilangi yili omilongo 90.Mbika oya adhika momikunda dhili poMile 20 , Mile 30, Mbeyo nEpingiro, adhihe ndhika odhili moshitopolwa shewiliko lyopamuthigululwakalo gwaaMbunza.Omikunda ndhika adhihe otadhi adhika kuumbugantu wa Rundu. Oku teta omiti inaashi pitikwa  ota ku hokololwa kuuka pombanda moshitopolwa sha Kavango. Omuwiliki gwelelo lyopahedhi lyaaMbunza, omukwaniilwa, Alfons Kaundu okwa ti omaloli gatatu ga li mondjila oku ya kOshikango mOhangwena oga li ga monika taga tutu iipilangi.Kaundu okwa ti okuteta omiti shaali paveta okwa li kwa lopotwa oku za kaakwashigwana sho ya mono aantu taya tete omiti yaana ooperemeta dhoku shi ninga.Ewiliko lyopahedhi olya li lya pulapula omulumentu gumwe nomukiintu kombinga yeteto lyomiti yaana uuthemba noshinima shika aniwa oye shi zimine. Omiti ndhoka dha tetwa ngaaka aniwa ohadhi tulwa mooha dhondjila ya Trans Caprivi Highway noku landithwa koodola omulongo mukehe gumwe. Omiti odhindj dhaandhika oha dhi tutwa niiyenditho oku falwa kOshikango noshowo ko South Africa hoka ha dhi ka landithwapo koondando dhili pombanda noonkondo.Omukwaniilwa gwa Mbunza okwa ti oku na omaipulo kombinga yoshinima shika omolwashoka omiti dhiiyimati nadho odhimwe dhaandhoka dha tetwapo. Kaundu okwa gandja ombedhi kaanambelewa yamwe yomakuti mboka aniwa ha ya longele kumwe  naantu mboka haya tetepo omiti ndhoka.Okwa ti poompito odhindji opwa li pwa kwatwa aantu mboka ya tete iiti shaali paveta naambaka nando oya falwa koombelewa ndhoka, sigo oompaka kapena aniwa nando ogumwe gwawo a landulwa noku geelwa.Omuwiliki gwaMbunza onkene okwa tokola okwiindika eteto lyiiti moshitopolwa she sigo uuna ndoka etokolo ndika lya kuthwapo. Okwa londodha kutya okuteta huka otaku ningitha omakuti ga mbugale.. Omiti ndhoka niipilangi mbyoka ota yi falwa koombelewa oonene dhelelo lyoshigwana she hoka taku ka tokolwa kutya ota dhi ka ningwa ngiini. Nampa

---