Okongresa ya NUNW omehuliloshiwike

EHANGANO lyomahangano gaaniillonga mu Namibia nenge Namibia National workers Union (NUNW) olya li lya gongala Etiyali, opo li kandule po uushongo uushona pamwe nomahangano ngoka ge li kohi yondundahangano ndjika.

Omashongo gamwe ngaka otaga eta  ehilathano momahangno ngoka ge li iilyo ya NUNW.  Ehangano ndika ota li ka ninga Okongresa yalyo mehuliloshiwike ndika.Oshigongi osha tala woo elandulathano lyiikundathanwa yokongresa ndjoka. Ota ku tiwa elandulathano lyiikundathanwa olya kala oshinima oshidhigu shoshigongi shoka hashi ningwa konima yomimvo ne kehe.
Ota ku kundanekwa kutya aaleli yamwe yomahangano gaaniilonga oya li taya ningi iikonga ya hala iinima mbyoka ta yi gumu aaniilonga ngaashi ehangano lyoopenzela dhaaniilonga yepangelo nenge Government Institutions Pension Fund (GIPF) noshowo egandjo lyiiyemo yopetameko Basic Income Grant (BIG) yi kale oshitopolwa shoonkundathana.
Yalwe aniwa oya hala iiningomwa mbika ya pupyala yi ethiwe ya gumwe moonkundathana. Omathimbo ga piti po NUNW okwiikuthilemo mengungo lyaamboka taya kondjo opo pu etwe shoka hashi ithanwa egandjo lyiiyemo yopetameko.
Ndika olina elalakano opo omuntu kehe megumbo moshilongo ashihe a pewe oodola ethele okugwedha kiiyemo ye yokomwedhi kehe.Opwa itaalwa kutya aaleli yaaniilonga oyi ikuthamo moshinima sha BIG oshoka aniwa oya thiminikwa kepangelo ye shi ninge, oshoka epangelo lyo ita li yambidhidha edhiladhilo ndika lyokugandja oodola ethele komuntu kehe.
Esithahoni lyomapungulo ngoka ga longitha omikuli okuza moshiketha sho GIPF oshikundathanwa oshikwawo shoka aaleli yamwe yaaniilonga unene tuu mboka yeli mewilikongundu lyoshiketha inaa ya hala shitulwe momusholondondo gwiikundathanwa yokongresa.
Oshinima shika osha eta opo amushangandjayi gwa NUNW, Evilastus Kaaronda yiipalamene noohamushanga yomahangano lyaaniilonga yomepangelo nenge NAPWU nehangano tali kalelepo aalongi ya Namibia NANTU ya kale yiipalamena.
NAPWU na Nantu oye na aawiliki yawo haya kuutumba mewilikongundu lyoshiketha shoopenzela dhaaniilonga yepangelo ano GIPF. Iikundathanwa yimwe yina sha noKongresa oyo mbika ngele oshi li nawa opo aaleli yaaniilonga ya kale ta ya kuutumba momawilikongundu gomahangano na ngele aaniilonga yena sha nekuto miilonga momahangano ota ya vulu okuhogololwa ya ninge aaleli momahangano gaaniilonga. Ongundu yimwe yaawiliki yaaniilonga oya tokola opo iinima mbika iidhigu  yi kuthwe mo melandulathano lyiikundathanwa, konima sho aniwa yu ulike kutya oyu uvite oyo taya popilwamo ngele shika osha etwa komeho gokongressa. Ekotampango lya NUNW ota li utha kutya elandulathano lyiikundathanwa oli na oku tungwa po nokumanithwa omwedhi gumwe omanga okongressa ina yi tameka , ndele pethimbo ndika shika osha fa inaashi ningwa.
The Namibian oya kundanekwa koonzo dhishi kwiinekelwa kutya aaleli yepangelo  oya landula nuukeka omainyengo agehe ngoka taga ningwa po melongekidho lyoshigongi shika.Ota ku tiwa eitulemo lyawo oli na sha nankene  ekondjelo lyoshipundi sho NUNW ta li ka nwethamo okongressa yo Swapo moma 2012. NUNW, ongo ewawa limwe lyo  Swapo Party oha li tumu aakalelipo ye li 15 ko kongresa yo Swapo.
Iilyo yimwe iikuluntu yo Swapo otaku tiwa oya kutha ombinga shiiwetikile nelalakano opo aaleli yaaniilonga mboka ta ya ka hogololwa ya vule oku ya kwathela pokongressa yo Swapo.
Oominista mbali dhoabinete otaku popiwa aniwa dha idhopomo melongekidho lyokongresa  no dha thitike opo iikundathanwa iidhigu  ya kundathanwe poshigongi shoka. Ota ku tiwa ekondjithathano oli li pokati koongundu mbali yimwe ota yi wilikwa ku Peter Nevonga gwa Napwu na David Namalenga omupevi peresidende gwa NUNW kombinga yimwe omanga onkwawo ota yi kwatelwa komeho ku  Kaaronda.
Kaaronda okwa li ta indile kutya mboka ya li ya kalelapo aaniilonga mewilikongundu lyaGIPF oye na okutsikwa uudhigu wo kweetha iimaliwa yoopenzela dhaaniilonga ta yi kana. Epopyo ndika olya ka eta oshikonga shoka tashi ningwa opo Kaaronda kaa shunwe mo miilonga yuuhamushanga ndjayi wa NUNW pokongressa ndjika.
Mboka ya hala okutidha mo Kaaronda pokongresa ndjika oya ti nguka aniwa okwa ndopa oku wilika  nokulela NUNW, na okuna omaunkundi inaaga tumbulwa ongo omuwiliki gwaaniilonga.
Otaku popiwa kutya iilyo ya Napwu miitopolwa, unene tuu mboka ta yeya kokongresa ongo aakalelipo oya lombwelwa opo yaa hogolole Kaaronda ongo ongo amushangandjayi , ndele ya hogolole  amushanga nale gwe hangano lyaaniilonga yomofaalama, Alfred Angula na Namalenga ongo omuperesidende gwa NUNW paulwawo.
The Namibian oya mona etumwalaka lyopangodhi ta li gandja elombwelo ndika. Nonando ehogololo ota li yi komeho iilyo yimwe yo, Napwu mbyoka ta yi ya koshigongi oyi na uumbanda kutya ota yi thiminikwa yi hogolole aawiliki ina yi ya hala.

---