Okahandja momilema sho Nampower a dhimi oolamba

AAKALIMO omayovi mOkahandja oya li momilema konyala esiku alihe mEtiyali.Omilema odha etwa ketokolo lya Nampower okudhima omalusheno goshilando shoka, molwaashoka aniwa oshina oongunga inaadhi futwa.

Otaku hokololwa elelo lyOkahandja lya ndumbalelwa koondjo dhoodola oomiliona hetatu, na Nampower okwi idhidhimikile olule oshinima shOkahandja iha ka futu omayakulo gako.

Ondhima yoshilando shika oyo yotango  nkene tuu oshilongo sha mangulukile tayi ningwa. Okahandja oko oshilongo shimwe shi na oofabulika odhindji ngaashi ndjoka yokawe,yoongaku yonyama, yoominino dhomeya nosho tuu.Okwaana lusheno hoka kwa li moshilando shika okwa piyaganeke oongeshefa adhihe, odhindji dhomudho odha mwena nenge dha pata.O The Namibian sho ya talelepo Okahandja metiyali oya adha oombaanga dha pata, iikwangodhi itaa yi longo,ombelewa dhopoosa dheedhila, oshoka ndhika kadha li tadhi vulu okulonga dhaana olusheno.Ota ku kundanekwa kutya oongeshefa dhimwe mOkahandja odha hala oku fala elelo lya Kahandja kompangu oshoka ndhika odha kanitha oshindji, molwondhima na ishewe molwaashoka inaa ya landwa esiku ndyoka.

Pompito yimwe opolisi oya li ya ithanwa opo yi kalekepo elandulathano sho aakalimo ya li ya hala oku ya moombelewa dhelelo lyaKahandja.Aaniilonga yamwe moombelewa dha muni gwaKahandja oya yi ondapo molwa uumbanda.Pethimbo aantu taya hololola omadhiladhilo gawo, omunambelewa omukuluntu melelo lyoshilando okwa li takundathana naawiliki ya Nampower poombelewa dhe hangano ndyoka opo olusheno lu temwe ishewe.Nampower okwa ulike kutya Okahandja okena oongunga dholusheno inaadhi futwa  dhoodola oomiliona 7,9. Ehangano lyomalusheno olya ti olya hala  lifutwe oodola oomiliona 4,9 omanga olusheno inaa lu temwa ishewe.Elelo olya gwanithapo elombwelo ndika nolusheno olwa galukile ishewe moshilando.

---