Gumwe a lopotelwa ekwatonkonga lyomonakadhona

OSHIPOTHA shomukalimo gwomoVenduka ngoka a lopotelwa ekwatonkonga lyomukiintu ngoka a vala naye aanona yatatu sho aniwa a kala noku mu kwata koonkondo okuza sho a li e na omimvo omugoyi, oshuunduliwa komasiku 27 gomwedhi nguka.

Jack Coetzee gwomimvo (52)okwa taalela etamaneko lyekwato koonkondo, noshowo lyokuponokela kwaashi okwaa nawa. Omatamaneko ngaka gaali oga kankamekelwa komanyenyeto ngoka ga gandjwa komunyenyeti ngoka ena omimvo (21) ngashingeyi.
Moshipotha shilwe mompangu oyo tuu ndjoka Coetzee ota tamanekelwa okukwata koonkondo  noshowo okumbandameka. Ndika olya etwa komunona gwomimvo 10 , omukwanezimo lyomukiintu ngoka a vala uunona utatu na Coetzee.
Nakutamanekwa okwa kala mondholongo okuza tuu sho a mangelwe mu Desemba omumvo gwayi. Eindilo lye opo a ze mo mondjedhililo ota li pulakenwa ku Mengestrata,Melaney Theron mo Venduka.
Pethimbo lye pulakeno lyiihokolola,  Coetzee okwa zimine kutya okwa vala aanona yatatu naangoka emu ningile oshipotha. Omunona gwotango okwa valwa omanga nguka a li ena omimvo (15). Ota ku tiwa Coetzee okwa tamekele okukwata omukiintu nguka koonkondo omanga a li ashike omunona gwomimvo omugoyi.Pahapu dha Coetzee ye nomunokadhona nguka oya li ya uvathana oku ya momilalo.Oshipotha osha eta olutandu mezimo lyaanyenyeti mbaka yaali, osho mengestrata Theron a lombwelwa pethimbo lyiihokolola.
Metitatu oshiwike sha yi yina yomunona ngoka omukuluntu okwa indile ompangu opo yi mangulule Coetzee pakwiifutilamo. Omanga iilyo yilwe iyaali oya ti Coetzee na kale mondjedhililo.Omukulukadhi okwa ti Coetzee na pewe okwiifutilamo opo a ze mo ye a kale ta sile aanona ye mboka yatatu oshimpwiyu. Nguka okwa ulike kutya omataneko ngoka nguka ta ningilwa kage shi goshili.Okwa lombwele ompangu kutya oha talelepo natango omulumentu nguka mondholongo, sigo onena oku za tuu nkene nguka a kwatele omwana koonkondo konima yomimvo 11 dha ka pita.Omweeti gwiipotha okwe mu pula tati omuntu nguka oye a kwata omumoye koonkondo, ye okwa yamukula shoka oshina okuhololwa. Omutamaneki Anthony Wilson okwe mu pula kutya oku uvite ngiini koshinima shoka.
Okwa ti petameko okwa li ewete sha puka . Okwa pulwa kutya oshike sha li sha puka , ye ta ti ooshoka Coetzee a longo, unene tuu kombinga yomunona gwotango. Okwa gwedha ko ta ti ngiika oshinima oshomonkalo yandje ashike kandina edhiladhilo lyasha sigo uuna ndoka nda mono uuyelele awuhe.
Ombangi yimwe sho ya hokolola oya ulike kutya oshinima shika osha eta etopoko mezimo, na omunona ngoka omukuluntu okwa hala okweetha oshipotha shoka.
Ombangi onkwawo oya ti omunona ngoka guunona uuyali okwa ningi oshipotha konima sho nguka omushona naye a ti okwa kwata omunona nguka gwomimvo (10),koonkondo.
Okakadhona oka ningi omalundilo ngaka konima sho ndohotola e ka konakona eta mono kutya  otaka holoka ka yonagulwa pamilalo.

---