Dhoompilameno dhapandula etokolo

OONGUNDU dhompilameno odha pandula etokolo lyOmpangu Onene yoshilongo ndyoka lya utha kutya oshipotha shomahogololo shoka oongundu ndhika dha indilile Ompangu yOpombanda yi pulakene, na shi ka pulakenwe kOmpangu ndjoka.

Omupanguli omukuluntu, Peter Shivute okwa lesha etokolo ndyoka muuwanawa woongundu ndhoka omugoyi sho a shunitha oshipotha shika kOmpangu yOpombanda. Ongundu ta yi pangele oya li tayi holoka ya kunkwa. Aayambidhidhi yompilameno oya li taya papatelathana pondje yOmpangu Onene yoshilongo, omanga aaleli yo Swapo yathikama ya tala ko.Amushangandjayi gwo DTA, McHenry Venaani okwa ti etokolo ndika ewanawa ta li ulike kutya oompangu odhi ithikamena.Okwa gwedha ko tati oongundu ndhika omugoyi odhi na oshipotha sha kola. Omanga kombinga ye omuleli gwongundu ya RP, Henk Mudge okwa ti okwa nyanyukwa oshoka  esiku ewanawa kuNamibia. Omunashipundi shOkommissi yomahogololo, Victor Tonchi okwa ti etokolo olya ningwa ngaashi lili, ndele tse otwa enditha omahogololo gamanguluka, no ge li nawa.Omupopiliko gwa CoD, Natji Tjirera okwa ti einekelo lyaantu mOompangulilo olya kolekwa. Oshoka etokolo ndika ota li ulike kutya otaya vulu okutula einekelo lya wo moshikondo shoompangu.

Minista gwegameno nepopilo, Nangolo Mbumba pamwe na minista gwopevi gwuuministeli wuukashike kookantu, Angelika Muharukua oya li yaa na omukumo omunene. Mbumba okwa ti tse atuhe aakwashigwana tu na oku simaneka oompango nokuvulika kudho. Otwa simaneka woo etokolo lyOmpangu.

Albert Kawana, hahende ndjayi  noMinista mombelewa yomuperesidende okwa ti ndika olyo etameko lyondjila onde, ndjoka tashi vulika tayi yi sigo okomumvo 2012. Okwa ti kashi shi oshiwanawa opo Ompangu yi ninge etokolo ta li endelele. Oshipotha osha tamekele mOmpangu yOpombanda nangashingeyi osha shunithwa ishewe kOmpangu oyo tuu ndjoka, nongundu ndjoka ya kana mwaashika otashi vulika ishewe yi galukile kOmpangu onene yoshilongo.

Popepi nOmpangu Onene opwa li ongundu oshona yaa yambidhidhi yo RDP taya dhana nokunyanya nokwiimba kohi yetonatelo lyopolisi yoshitopolwa sha Khomas.Ongundu yo RDP oya ningi oshigongi shoonkundana, mpoka pwa leshwa omushangwa komutse gwongundu ndjoka Hidipo Hamutenya ngoka a ti uuyuki owa popi nokwa pandula oohe nooyina yoshigwana

sho ya tungapo ekotampango ndyoka lya topola iitayi yepangelo naashika osha pa oompangu eithikameno.Hamutenya okwa pandula iilyo yongundu ye noshowo aanaveta yawo. Okwa ti oshipotha osha kutha po iimaliwa oyindji moondjato dhoongundu dhompilameno.Hamutenya okwa ti etokolo ndyoka olyo etameko lyolweendo olule okufula muule okukonga ehuku lyomahogololo ga Novomba 2009 ngoka oongundu tadhi ti oga fukilwa.Amushangandjayi  gwo CoD, Tsudao Gurirab okwa ti shika osho shotango kutya oongundu ndhoka dha fala oshipotha kompangu odha thikama sigo opehulilo inaadhi tenguka  mokukondja kwadho okumona uuyuki.

---