Aayambidhidhi yo Vietnam Rangers Kombaye ya yambidhidha Osipana yawo

By: OSWALD SHIVUTE

AAYAMBIDHIDHI yosipana yEtanga lyokOompadhi ya tseyika nawa yopUukwangula mUukwambi moshitopolwa sha Shana mboka haya longo kOmbaye, omasiku ngaka oya yambidhidha Osipana yawo ndjika noshimaliwa shOondola/N$1700 opo yi shi tule mOkambo kayo yi kale tayi ikwathele nasho moompumbwe dhayo dhi ili nodhi ili.

Oshimaliwa shika osha pewa nee tate Werner Itengula, ngoka e li oshilyo, omukuluntu nomuyambidhidhi omunene gwOsipana yawo ndjika Vietam Rangers, okuza kOmbaye hoka, e shi etele Osipana yawo ndjika. Oshimaliwa shika tate Itengula okwe shi pe nee Menindjela, ano Omukuluntu gwOsipana ndjika Vietnam Rangers, tate  Matheus Amesho, sha ningwa nee  ohela meti 2 Septemba 2010. Tate Itengula ota ti kutya oshimaliwa shOoN$300 osha tulwa nale kOkambo kosipana nohela okwa gandja nee ashike shoka sha hupa ko shOoN$1400. Okasilepa kOmapungulilo nako, tate Itengula, okwe ka pa tate Amesho ohela ndjoka.

“ Elalakano lyokugandja oshimaliwa shika kOsipana yetu okuzilila kaayambidhidhi yayo mboka haya longo kOmbaye, olyo okuyambula po Osipana yetu ndjika. Twa dhilaadhila okukwathela aanona mokuya enditha uuna taya ka dhana komahala gi ili nogi ili noshowo oku ya landela omizalo dhetanga ngashi unene oongaku kwaamboka tu shi kutya itaya vulu nande oku dhi ilandela nosho tuu. Osipana otayi ende nawa  yuuka komeho noya pumbwa omayambidhidho, onkee twa  tokola okugongela oshimaliwa ngeyi tu yi kwathele opo yi vule okwiinyenga,” tate Itengula ta ti ngawo nokupandula noonkondo tate Robert Shimooshili ngoka a gandja omayele ngaka kaayambidhidhi yOsipana yOvietnam Rangers mboka haya longele kOmbaye, opo ya kale taya yambidhidha osipana yawo ndjika noshimaliwa, oshoka ohaya mono iihuna unene tuu momalweendo okuya ya ka dhane komahala gi ili nogi ili noshowo nee kombinga yiikwathitho yilwe yi ili noyi ili yi na sha nomaudhano getanga kyokoompadhi. Osipana ndjika yo Vietnam Rangers ohayi dhana moshitopowla oshitiyali shOmaudhano gOpashitopolwa nohayi inyenge nee nolundji mpaka naampeyaka..

Tate Amesho, pehala lyEwilikongundu lyOsipana yawo nOsipana ayihe kumwe niilyo naayambidhidhi yayo ayehe, okwa pandula noonkondo omakanda omakwawo ngoka gokOmbaye, sho ga tokola okugongela oshimaliwa shi thike mpoka noku shi tumina Osipana yawo yi ikwathele nasho.Ta pandula wo naye tate Shimooshili sho a gandja omayele omawanawa gokukwathela Osipana gatya ngawo. “ Otu na oompumbwe odhindji shili, ngashi unene okweenditha aanona okuya ya ka dhane komahala gi ili nogi ili nohatu kala twa pumbwa oshimaliwa shomahooli nosho tuu, omanga anaona yamwe ya pumbwa omizalo dhokudhanitha, unene tuu oongaku dhokudhanitha nadho. Onkee shoka sha ningwa po koohailwa yakwetu yokOmbaye, oshi shi kupandulwa noonkondo. Ohatu kala wo twa pumbwa aadhani yokolela mboka haya landwa noshimaliwa notu wete kutya noshimaliwa twa pewa kaayambidhidhi yOsipana yetu okuza kOmbaye, otatu ka vula lela okukandula po oompumbwe dhimwe dhomoompumbwe tu na. Otatu shi pandula shili noonkondo,” tate Amesho ta ti nagwo nolupandu nokuhalela ayehe ompolo yi li nawa miilonga nomonkalo yawo ayihe.

---