Aanafaalama yOngombe naa ye kumwe

OONTAMANANA pokati koongundu mbali mehangano lyaanafaalama lyedhina Ongombe Farmers Association (OFA) okulongitha iigunda yokulanditha oongombe pOkamatapati odhi na okupotokononwa.

Minista Yuunamapya, John Mutorwa okwa gandja elombwelo ndika, a ti oongundu ndhika tadhi kondjithathana odha pumbwa woo okwiimanga kumwe etadhi kala ehangano limwe.

Mutorwa okwa ti mbaka oya pumbwa ya ye kumwe omanga inaa pa shainwa euvathano epe lyokulongitha iigunda yokulandithila iimuna mu May omumvo ta gu ya. 

Sho a popi konima yehokololo lya shangwa moThe Namibian omaandaha kombinga yetopoko ndika Mutorwa okwa ti otashi uvitha nayi kutya ongundu yimwe yomoongundu mbali inayi holoka peshaino lyeuvathano mu 2 ga Juni nuumvo.

 Mutorwa okwa ulike kutya ekankameno lyuuministeli olyo natango ndyoka kutya ehangano ndika likale nelelo limwe lyopakathimbo manga pwa tegelelwa oshigongi shokomumvo, mushoka tamu ka ulikwa ehangano limwe , ekotampango limwe , noshowo ewiliko limwe, ndyoka li na okukal miilonga pethimbo ta ka ningwa eshaino lyeuvathano epe omumvo ta guya, osho Mutorwa a lombwele The Namibian mEtiyali. 

Ehangano lya OFA olya li lya dhikwapo omanga oshilongo inaashi manguluka, nolya topoka mo 2007 konima shopwa holoka oontamanana mo 2006 kombinga yehala mpoka ta pa kala noku ningilwa omauliko giipindi yuunangombe ngele opOkakarara nenge opOkamatapati mpoka pena iigunda yomaulikilo ya holomende. 

Iigunda mbika oya li hayi thithwa kehangano ndika okuza koholomende. Ongundu yimwe ya OFA oya tokola omumvo gwa yi kutya otayi  ningi oshilyo sha Namibia Agricultural Union ndyoka ha li longo unene naanafaalama yiipundi. Ongundu onkwawo oya thigala ongo oshilyo shehangano lyaanafaalama yopashigwana ya Namibia (NNFU). 

Etopoko ndika olya eta woo olutandu  moshigwana shomomudhingoloko moka.Oomvula mbali dha piti Minista Mutorwa okwa li a kutha po euvathano lyokulongitha iigunda yomaulikilo giimuna, na okwa gandja elombwelo kutya mbika ota yi kala nokulongithwa kungoka oye a ningi eindilo tango.Nuumvo Ominista yAaniilonga  Immanuel Ngatjizeko okwa tsakanene noongundu ndhika mbali opo edhi hanganithe. 

Naandhika odha li dhina okushaina euvathano mu Juni nuumvo ndele ongundu ndjoka ya kala mehangano lyopashigwana lyaanafaalamaaNamibia mewiliko lya Chris Katjitundu ina li ya ko keshaino. 

Oshiwike sha yi Katjitundu okwa ti iinima mbyoka ya eta oontamanana inayi kandulwa po mwakwatelwa nekanepo lyembakumbaku noshowo kutya iimaliwa yoodola omilona yimwe oshinkwanu ntano yomagano ga za kaagandji yooshali oya longithwa ngiini. Okwa ti yo oya hala Ngatjizeko a mone omayamukulo komapulo ngaka opo mbika yi kwathele epotokonono lyoontamanana mokati kaambaka. 

Okwa ti ongundu ye oya  li ya fala onkwawo kompangu  opo ompangu yi ya indike yaa longithe ehala ndyoka omumvo gwa ziko noshinima shika natango inashi pwa.

Oshigongi shoonkundana sha Katjitundu osha etwa komapopyo ga Albert Tjihero omuwiliki gwa OFA ngoka iimanga kehangano lya Namibia Agricultural Union. Tjihero okwa li aniwa a popi ndhika moradio ya NBC kutya Ngatjizeko okwa manitha iilonga yokuhanganitha. 

---